కామారెడ్డి జిల్లా లింగంపేట్ మండలం రాంపల్లి కోన తండాకు చెందిన దేవసోత్ శ్రీహరి సోమవారం పొలం పనుల నిమిత్తం వెళ్లిన అనంతరం ఇంటికి తిరిగి రాకపోవడంతో కుటుంబ సభ్యులు ఆందోళన చెందారు. భారీ వర్షాలతో ఉద్ధృతంగా ప్రవహిస్తున్న పెద్దవాగు దాటే సమయంలో వరద ప్రవాహంలో కొట్టుకుపోయి ఉండవచ్చని గ్రామస్థులు అనుమానించారు.

సమాచారం అందుకున్న వెంటనే రెవెన్యూ అధికారులు, పోలీసులు, అగ్నిమాపక శాఖ సిబ్బంది సంఘటనా స్థలానికి చేరుకుని గాలింపు చర్యలు ప్రారంభించారు. వరద ఉద్ధృతి అధికంగా ఉండటంతో ప్రత్యేక రిస్క్ రెస్క్యూ టీమ్ను రంగంలోకి దించి నిన్నటి నుంచి నిరంతరంగా గాలింపు చేపట్టారు.

మంగళవారం ఉదయం పెద్దవాగు పరివాహక ప్రాంతంలోని ముళ్లపొదల్లో శ్రీహరి మృతదేహాన్ని రిస్క్ టీమ్ గుర్తించి బయటకు తీసింది. అనంతరం మృతదేహాన్ని పోస్టుమార్టం నిమిత్తం ప్రభుత్వ ఆసుపత్రికి తరలించారు.

ఈ ఘటనతో రాంపల్లి కోన తండాలో తీవ్ర విషాదం నెలకొంది. కుటుంబ సభ్యుల రోదనలు స్థానికులను కలచివేశాయి. భారీ వర్షాల కారణంగా వాగులు, వంకలు ప్రమాదకరంగా మారిన నేపథ్యంలో ప్రజలు అత్యంత అప్రమత్తంగా ఉండాలని అధికారులు సూచించారు.