మల్కాజిగిరి మున్సిపల్ కార్పొరేషన్ పరిధిలోని నాగారం డివిజన్–5లో పారిశుద్ధ్య నిర్వహణపై ప్రజల్లో అసంతృప్తి వ్యక్తమవుతోంది. డివిజన్‌లోని పలు ప్రాంతాల్లో రోడ్ల పక్కన చెత్త కుప్పలు పేరుకుపోవడంతో స్థానికులు తీవ్ర ఇబ్బందులు ఎదుర్కొంటున్నారని టీఆర్‌పీ నాయకులు ఆరోపించారు.

రోడ్ల పక్కన ప్లాస్టిక్ వ్యర్థాలు, పాత టైర్లు, కుళ్లిపోయిన చెత్త పేరుకుపోవడంతో పరిసరాలు అపరిశుభ్రంగా మారుతున్నాయని, దోమలు, ఈగలు వృద్ధి చెందే పరిస్థితి ఏర్పడుతోందని వారు ఆవేదన వ్యక్తం చేశారు.

ప్రజలకు కావాల్సిన పరిశుభ్రమైన వాతావరణం కల్పించాల్సిన అధికారులు చెత్త నిర్వహణలో మాత్రం నిర్లక్ష్యంగా వ్యవహరిస్తున్నారని టీఆర్‌పీ నాయకులు విమర్శించారు.

ప్రజలు ఎన్నిసార్లు సమస్యను అధికారుల దృష్టికి తీసుకెళ్లినా పూర్తిస్థాయిలో చెత్త తొలగింపు చర్యలు కనిపించడం లేదని వారు అన్నారు. ప్రజారోగ్యానికి సంబంధించిన పారిశుద్ధ్య సమస్యను అధికారులు తక్షణమే పరిష్కరించాలని డిమాండ్ చేశారు.