బీబీపేటలో రాఖీ పౌర్ణమి సందడి

రేపు జరగనున్న రాఖీ పౌర్ణమి సందర్భంగా కామారెడ్డి జిల్లా బీబీపేట మండల కేంద్రంలో పండుగ సందడి నెలకొంది. మండలంలోని చుట్టుపక్కల గ్రామాలైన కోనాపూర్, ఉప్పర్‌పల్లి, ఇస్సానగర్, తుజాల్‌పూర్, షేర్ బీబీపేట, మల్కాపూర్, యాడారం, జనగామ తదితర గ్రామాల నుంచి ప్రజలు రాఖీ పండుగ కొనుగోళ్ల కోసం బీబీపేటకు తరలివస్తున్నారు.

అక్కా చెల్లెళ్లకు స్వాగతం

ఈ సందర్భంగా తాజా మాజీ ఎంపీటీసీ కొరివి నీరజ భర్త కొరివి నరసింహులు బీబీపేటకు వచ్చే అక్కా చెల్లెళ్లు, అన్నదమ్ములకు స్వాగతం పలుకుతూ వారికి అవసరమైన సహకారం అందించారు.

ప్రతి ఒక్కరికీ స్వాగతం

ఈ సందర్భంగా కొరివి నరసింహులు మాట్లాడుతూ.. రాఖీ పౌర్ణమి సందర్భంగా బీబీపేట మండలానికి వచ్చే ప్రతి ఒక్కరికీ “స్వాగతం.. సుస్వాగతం” అని తెలిపారు. పండుగ సందర్భంగా వ్యాపారులు మంచి వ్యాపారం చేసుకోవాలని, మండలానికి వచ్చే ప్రతి ఒక్కరూ సంతోషంగా తిరిగి వెళ్లాలని ఆకాంక్షించారు.

ఎవరైనా వ్యాపారులు బీబీపేట మండలానికి వచ్చి వ్యాపారం చేసుకోవచ్చని, వారికి తమ వంతు సహకారం అందిస్తామని తెలిపారు.

అన్నాచెల్లెళ్ల అనుబంధానికి ప్రతీక రాఖీ

రాఖీ పౌర్ణమి అన్నాచెల్లెళ్లు, అక్కాతమ్ముళ్ల మధ్య ప్రేమానురాగాలకు ప్రతీకగా నిలిచే గొప్ప పండుగ అని నరసింహులు అన్నారు. సంవత్సరానికి ఒక్కసారి వచ్చే ఈ పండుగ సందర్భంగా కుటుంబ సభ్యులు, బంధుమిత్రులు కలుసుకోవడం ఆనందంగా ఉంటుందని పేర్కొన్నారు.

ప్రజలందరూ కులమత భేదాలు, కోపతాపాలు, పాత విభేదాలను పక్కనపెట్టి సోదరభావంతో రాఖీ పండుగను జరుపుకోవాలని కోరారు. అన్నాచెల్లెళ్లు, అక్కాతమ్ముళ్లు పరస్పరం రాఖీలు కట్టుకుని ప్రేమాభిమానాలను చాటుకోవడం ద్వారా సమాజంలో ఐక్యత, సోదరభావం మరింత బలపడుతుందని అన్నారు.

ప్రజలందరూ సుఖశాంతులతో ఉండాలి

బీబీపేట మండల ప్రజలందరూ ఆయురారోగ్యాలతో నూరేళ్లు సుఖశాంతులతో జీవించాలని, పాడిపంటలు సమృద్ధిగా పండాలని, సమృద్ధిగా వర్షాలు కురిసి రైతులు సంతోషంగా ఉండాలని నరసింహులు ఆకాంక్షించారు.

“అందరూ బాగుండాలి.. అందులో మేము కూడా బాగుండాలి” అనే భావనతో ప్రజలందరి సంక్షేమాన్ని కోరుకుంటున్నామని తెలిపారు. రాఖీ పౌర్ణమి సందర్భంగా బీబీపేట మండలంలోని అక్కలు, చెల్లెళ్లు, అన్నలు, తమ్ముళ్లకు హృదయపూర్వక శుభాకాంక్షలు తెలియజేశారు.