కార్యక్రమంలో జిల్లా TUWJ అధ్యక్షుడు రజినీకాంత్, మీడియా అధ్యక్షుడు శ్రీనివాస్, సీనియర్ జర్నలిస్ట్ పద్మ పండరి, అడ్వకేట్, లీగల్ అడ్వైజర్ గోపాల్ రావు, అడ్వకేట్‌తో పాటు జిల్లా కార్యవర్గ సభ్యులు, సీనియర్ జర్నలిస్టులు, ఎలక్ట్రానిక్ మీడియా ప్రతినిధులు పాల్గొన్నారు.

మీడియా రంగంలో సాంకేతిక పరిజ్ఞానం వేగంగా మారుతోందని మీడియా ప్రతినిధులు తెలిపారు. ముఖ్యంగా ఆర్టిఫిషియల్ ఇంటెలిజెన్స్ (AI), సోషల్ మీడియా, వివిధ డిజిటల్ వేదికల వినియోగం పెరిగిన నేపథ్యంలో వార్తల వాస్తవ నిర్ధారణ మరింత కీలకంగా మారిందని పేర్కొన్నారు.

సోషల్ మీడియా లేదా ఇతర డిజిటల్ వేదికల్లో కనిపించే సమాచారాన్ని నేరుగా వార్తగా ప్రచురించకుండా, సమాచారం మూలం, ఆధారం, సంబంధిత వ్యక్తులు లేదా అధికారుల నుంచి సాధ్యమైనంత వరకు ధృవీకరణ తీసుకున్న తర్వాతే వార్తలను ప్రచురించడం లేదా ప్రసారం చేయాలని సూచించారు.

AI ఆధారంగా రూపొందుతున్న నకిలీ చిత్రాలు, వీడియోలు, ఆడియోలు, మార్ఫింగ్ కంటెంట్, తప్పుడు సమాచారాన్ని గుర్తించడంలో జర్నలిస్టులు మరింత అప్రమత్తంగా ఉండాలని అన్నారు.

కొన్ని సందర్భాల్లో ఇతర వేదికల్లో వచ్చిన సమాచారాన్ని పరిశీలించి, ప్రజా ప్రయోజనాన్ని దృష్టిలో ఉంచుకుని వార్తలను ప్రసారం చేస్తున్నప్పటికీ, అనంతరం జర్నలిస్టులు వివిధ ఇబ్బందులను ఎదుర్కొంటున్న పరిస్థితులు ఉన్నాయని మీడియా ప్రతినిధులు ఆవేదన వ్యక్తం చేశారు.

జర్నలిస్టులు వాస్తవాల ఆధారంగా వార్తలను అందించేందుకు అవసరమైన వాతావరణాన్ని సంబంధిత వర్గాలు కల్పించాలని కోరారు. వార్తలపై ఏదైనా వివాదం తలెత్తినప్పుడు ముందుగా వాస్తవాలను పరిశీలించి, సంబంధిత జర్నలిస్టు లేదా మీడియా సంస్థ వివరణను కూడా పరిగణనలోకి తీసుకుని చట్టపరమైన విధానంలో ముందుకు వెళ్లాలని సూచించారు.

జర్నలిస్టులపై నమోదవుతున్న కేసులు, వృత్తిపరమైన భద్రత, ఇతర సమస్యల పరిష్కారం కోసం ప్రతి మీడియా జర్నలిస్టు ఐక్యతతో ముందుకు సాగాలని జిల్లా అధ్యక్షుడు రజినీకాంత్ పిలుపునిచ్చారు.

జర్నలిస్టుల హక్కులు, వృత్తిపరమైన ప్రయోజనాల పరిరక్షణ కోసం సంఘాలు సమన్వయంతో పనిచేయాలని సూచించారు.

మీడియా సంస్థలకు ప్రకటనలు, ప్రభుత్వ శాఖల నుంచి అధికారిక సమాచారం అందుబాటులోకి రావడంలో కొన్ని సందర్భాల్లో ఇబ్బందులు ఎదురవుతున్నాయని ప్రతినిధులు తెలిపారు.

ప్రజలకు సంబంధించిన ప్రభుత్వ కార్యక్రమాలు, అభివృద్ధి పనులు, సంక్షేమ పథకాలు, స్థానిక సమస్యలకు సంబంధించిన అధికారిక సమాచారాన్ని మీడియాకు సమయానుకూలంగా అందుబాటులోకి తీసుకురావాల్సిన అవసరం ఉందన్నారు.