ఎల్లారెడ్డి: స్థానిక ప్రభుత్వ డిగ్రీ కళాశాలలో తెలుగు విభాగం, ఐక్యూఏసీ విభాగాల ఆధ్వర్యంలో తెలుగు భాషా దినోత్సవాన్ని ఘనంగా నిర్వహించారు. వ్యవహారిక భాషా ఉద్యమకారుడు గిడుగు వెంకట రామమూర్తి జయంతిని పురస్కరించుకుని నిర్వహించిన ఈ కార్యక్రమంలో ఆయన చిత్రపటానికి కళాశాల ప్రిన్సిపాల్, అధ్యాపకులు, విద్యార్థులు పూలమాలలు వేసి ఘనంగా నివాళులర్పించారు.

ఈ సందర్భంగా కళాశాల ప్రిన్సిపాల్ డా. ఇ. లక్ష్మీనారాయణ మాట్లాడుతూ.. మాతృభాషలో మంచి ప్రావీణ్యం సంపాదించుకున్నప్పుడే ఇతర భాషల్లోనూ నైపుణ్యం సాధించగలమని అన్నారు. మాతృభాషపై విద్యార్థులు ప్రత్యేక శ్రద్ధ కనబరచాలని సూచించారు.

తెలుగు శాఖ అధ్యక్షుడు, ఐక్యూఏసీ కోఆర్డినేటర్ డా. శంకరయ్య మాట్లాడుతూ.. మన మాతృభాషతోనే మనకు గుర్తింపు ఉంటుందని అన్నారు. భాష నదిలాంటిదని, ఇతర భాషలకు చెందిన పదాలను తనలో కలుపుకుంటూ నిరంతరం ముందుకు సాగుతుందని వివరించారు. ఇతర భాషలకు చెందిన కవులు సైతం తెలుగు భాషను ‘సుందర తెలుగు’గా కొనియాడారని గుర్తుచేశారు.

వైస్ ప్రిన్సిపాల్ డా. ఎం. చంద్రకాంత్ మాట్లాడుతూ.. అంతరించిపోతున్న భాషల్లో తెలుగు కూడా ఉందని ఆందోళన వ్యక్తం చేశారు. పాఠశాల స్థాయి నుంచే విద్యార్థులకు తెలుగును తప్పనిసరిగా బోధిస్తూ, తెలుగు భాషపై ప్రత్యేక దృష్టి పెట్టాల్సిన అవసరం ఉందన్నారు.

సీనియర్ అధ్యాపకులు అమరేశం ప్రభాకర్ రావు ప్రాచీన తెలుగు భాష, సాహిత్యం విశిష్టత గురించి వివరించారు. తెలుగు భాష, సాహిత్య పరిరక్షణకు ప్రతి ఒక్కరూ కృషి చేయాలని పిలుపునిచ్చారు.