SIR ప్రక్రియపై ఆందోళన

దమ్మాయిగూడ డివిజన్ పరిధిలోని 39 పోలింగ్ బూత్‌లలో రెండో విడత SIR ప్రక్రియలో పలు వ్యత్యాసాలు చోటుచేసుకున్నాయని నాయకులు RDO దృష్టికి తీసుకువెళ్లారు. గతంలో సుమారు 48 వేల మంది ఓటర్లు ఉండగా, ప్రస్తుతం ఆ సంఖ్య దాదాపు 33 వేలకు తగ్గడం, అందులో కేవలం సుమారు 9 వేల ఓట్లు మాత్రమే క్లియర్ కావడం, మిగిలిన దాదాపు 24 వేల మంది ఓటర్లకు నోటీసులు జారీ కావడం పట్ల ప్రజల్లో ఆందోళన నెలకొన్నదని తెలిపారు.

నోటీసులకు తగిన సమయం ఇవ్వాలి

నోటీసులు అందుకున్న ఓటర్లకు అవసరమైన ఆధారాలు సమర్పించేందుకు కేవలం ఒక్కరోజు మాత్రమే గడువు ఇవ్వడం సరికాదని, వారికి తగినంత సమయం కల్పించాలని కోరారు. గతంలో ఓటు హక్కు కలిగి ఉండి, చెల్లుబాటు అయ్యే ఆధారాలు ఉన్నప్పటికీ నోటీసులు అందుకున్న ఓటర్ల అంశాలను ప్రత్యేకంగా పరిశీలించాలని విజ్ఞప్తి చేశారు.

ఓటర్ల తొలగింపుపై ప్రత్యేక దృష్టి

ఎలాంటి కారణం లేకుండా అర్హులైన పౌరుల ఓట్లు తొలగిపోకుండా తగిన చర్యలు తీసుకోవాలని కోరారు. ఒకే కుటుంబానికి చెందిన సభ్యులను వేర్వేరు పోలింగ్ బూత్‌లకు కేటాయించిన సమస్యలను పరిష్కరించాలని, సాధ్యమైనంత వరకు ఒకే కుటుంబ సభ్యులకు ఒకే పోలింగ్ బూత్ కేటాయించేలా చర్యలు తీసుకోవాలని విజ్ఞప్తి చేశారు.

BLOలు, BLA-2లకు స్పష్టమైన మార్గదర్శకాలు

క్షేత్రస్థాయిలో పనిచేస్తున్న BLOలు, BLA-2లకు ఆన్‌లైన్ డాక్యుమెంట్ అప్‌లోడింగ్, SIR నిబంధనలు, సాంకేతిక అంశాలపై స్పష్టమైన మార్గదర్శకాలు అందించాలని బీజేపీ నాయకులు సూచించారు.

యువతకు ఓటు నమోదు అవకాశం

అలాగే 18 సంవత్సరాలు నిండిన అర్హులైన యువతతో పాటు చిరునామా మార్పు చేసుకున్న అర్హులైన పౌరులకు ఎలాంటి సాంకేతిక ఇబ్బందులు లేకుండా ఓటర్ల జాబితాలో నమోదు చేసుకునే అవకాశం కల్పించాలని కోరారు.

అర్హత ఉన్న ఏ ఒక్క పౌరుడూ తన ఓటు హక్కును కోల్పోకుండా, ప్రతి దరఖాస్తును నిష్పక్షపాతంగా పరిశీలించాలని RDO అధికారిని విజ్ఞప్తి చేశారు.