లింగంపేట్ మండల కేంద్రంలో నిర్మాణంలో ఉన్న సంత్ సేవాలాల్–జగదాంబ మాత ఆలయానికి 1,000 సిమెంట్ బస్తాలను బహుకరిస్తున్నట్లు బీజేపీ రాష్ట్ర కార్యవర్గ సభ్యులు, జపాన్ శాస్త్రవేత్త డా. పైడి ఎల్లారెడ్డి తెలిపారు.

ఇటీవల లింగంపేట్‌లో బంజారా నాయకుల ఆధ్వర్యంలో నిర్వహించిన తీజ్ ఉత్సవాల్లో పాల్గొన్న సందర్భంగా బంజారా సోదరుల కోరిక మేరకు ఆలయ నిర్మాణానికి తన వంతు సహాయం అందిస్తానని ఆయన హామీ ఇచ్చారు.

డా. పైడి ఎల్లారెడ్డి మాట్లాడుతూ బంజారా సోదరుల పట్ల తనకు ఎంతో గౌరవం, అభిమానం ఉందన్నారు. బంజారా సమాజం తమ సంస్కృతి, సంప్రదాయాలు, ఆచార వ్యవహారాలను తరతరాలుగా కాపాడుకుంటూ వస్తోందని పేర్కొన్నారు.

సేవాలాల్ మహారాజ్, జగదాంబ మాత ఆలయాలు బంజారా సమాజానికి ఆధ్యాత్మికంగా ఎంతో ప్రాధాన్యత కలిగినవని తెలిపారు.

ఆలయ నిర్మాణం ద్వారా భక్తులకు ఆధ్యాత్మిక కేంద్రం అందుబాటులోకి రావడంతో పాటు బంజారా సంస్కృతి, సంప్రదాయాలను భావితరాలకు పరిచయం చేసే వేదికగా నిలుస్తుందని పేర్కొన్నారు.

బంజారా యువత తమ మూలాలను, సంస్కృతిని మరచిపోకుండా విద్య, ఉపాధి, సామాజిక అభివృద్ధిలో ముందుకు సాగాలని ఆయన ఆకాంక్షించారు.

ఆలయ నిర్మాణానికి 1,000 సిమెంట్ బస్తాలు అందించేందుకు ముందుకు వచ్చిన డా. పైడి ఎల్లారెడ్డికి బంజారా నాయకులు కృతజ్ఞతలు తెలిపారు.

ఈ కార్యక్రమంలో లింగంపేట్ మండల బంజారా కమిటీ సభ్యులు, బీజేపీ మండల కమిటీ నాయకులు, కార్యకర్తలు, స్థానిక బంజారా నాయకులు తదితరులు పాల్గొన్నారు.