ఎల్లారెడ్డి రెవెన్యూ డివిజనల్‌ అధికారి (ఆర్డీఓ) కార్యాలయంలో సోమవారం డివిజన్‌ స్థాయి ప్రజావాణి కార్యక్రమాన్ని నిర్వహించారు. డివిజనల్‌ అడ్మినిస్ట్రేటివ్‌ ఆఫీసర్‌ అనిల్‌ కుమార్‌ ఆధ్వర్యంలో జరిగిన ఈ కార్యక్రమంలో ప్రజల నుంచి మొత్తం 2 ఫిర్యాదుల దరఖాస్తులు స్వీకరించారు.

వీటిలో పంచాయతీరాజ్‌ శాఖకు సంబంధించి ఒకటి, ఆర్టీసీకి సంబంధించి ఒక దరఖాస్తు ఉన్నట్లు అధికారులు తెలిపారు. ప్రజలు తమ సమస్యలను అధికారుల దృష్టికి తీసుకురాగా, సంబంధిత శాఖల అధికారులకు దరఖాస్తులను ఫార్వర్డ్‌ చేశారు.

రాష్ట్ర ప్రభుత్వం ప్రతిష్టాత్మకంగా చేపడుతున్న ప్రజావాణి కార్యక్రమం ప్రజలకు అందుబాటులో ఉండేలా ప్రతి శాఖాధికారి చర్యలు తీసుకోవాలని అధికారులు సూచించారు.

ప్రజలు తమ సమస్యల పరిష్కారం కోసం కార్యాలయాల చుట్టూ తిరగాల్సిన అవసరం లేకుండా ప్రజావాణి ద్వారా అందే ఫిర్యాదులను సంబంధిత శాఖలు బాధ్యతగా స్వీకరించి సకాలంలో పరిష్కరించాలని సూచించారు.

ప్రజల నుంచి అందిన ప్రతి దరఖాస్తును సంబంధిత అధికారులు పరిశీలించి, సత్వర పరిష్కారానికి చర్యలు తీసుకోవడంతో పాటు ప్రజలకు ప్రభుత్వ సేవలు, సంక్షేమ కార్యక్రమాలు అందేలా సమన్వయంతో పనిచేయాలని ఆదేశించారు.

ఈ కార్యక్రమంలో డివిజనల్‌ అడ్మినిస్ట్రేటివ్‌ ఆఫీసర్‌ అనిల్‌ కుమార్‌తో పాటు ఎంఈఓ లింగాపూర్ రాజులు తదితర అధికారులు పాల్గొన్నారు.