హైదరాబాద్: బంజారా సమాజం, మైదాన ప్రాంత గిరిజనుల ప్రధాన సమస్యలను అసెంబ్లీ సమావేశాల్లో ప్రస్తావించి ప్రభుత్వాన్ని ప్రశ్నించాలని కోరుతూ బంజారా సేవాదళ్ తెలంగాణ నాయకులు మాజీ మంత్రి, సిద్దిపేట ఎమ్మెల్యే తన్నీరు హరీష్ రావును కలిసి వినతిపత్రం అందజేశారు. ఈ సందర్భంగా పలు డిమాండ్లను ఆయన దృష్టికి తీసుకెళ్లారు.

బంజారా సేవాదళ్ రాష్ట్ర అధ్యక్షులు రఘురాం రాథోడ్ మాట్లాడుతూ.. బంజారా సమాజం, మైదాన ప్రాంత గిరిజనుల సమస్యలపై అసెంబ్లీలో చర్చ జరిగేలా చూడాలని హరీష్ రావును కోరినట్లు తెలిపారు. చేవెళ్ల డిక్లరేషన్‌లోని హామీలను అమలు చేయాలని, మైదాన ప్రాంత గిరిజనుల సమగ్ర అభివృద్ధి కోసం ప్రత్యేక అభివృద్ధి బోర్డు ఏర్పాటు చేయాలని కోరారు.

అలాగే రాబోయే డిలిమిటేషన్‌లో మైదాన ప్రాంత గిరిజనులకు తగిన రాజకీయ ప్రాతినిధ్యం కల్పించాలని డిమాండ్ చేశారు. సిద్ధాపూర్ డంపింగ్ యార్డు సమస్యను పరిష్కరించాలని, GO No. 641ను పునఃసమీక్షించాలని విజ్ఞప్తి చేశారు.

ఫ్యూచర్ సిటీలో 20 ఎకరాల స్థలం కేటాయించి సంత్ శ్రీ సేవాలాల్ మహారాజ్ భవ్య మందిరాన్ని నిర్మించాలని, 100 అడుగుల విగ్రహాన్ని ఏర్పాటు చేయాలని, సేవాలాల్ మహారాజ్ కార్పొరేషన్‌ను ఏర్పాటు చేయాలని ప్రభుత్వం చర్యలు తీసుకోవాలని రఘురాం రాథోడ్ కోరారు. పాలమూరు–రంగారెడ్డి ఎత్తిపోతల ప్రాజెక్టు పరిధిలో భూములు కోల్పోతున్న రైతులకు న్యాయమైన నష్టపరిహారం, పునరావాసం కల్పించాలని కూడా విజ్ఞప్తి చేసినట్లు తెలిపారు.

బంజారా సమాజానికి రాజకీయ ప్రాతినిధ్యం కల్పించాలని విజ్ఞప్తి

బంజారా సేవాదళ్ అధికార ప్రతినిధి ఇస్లావత్ సురేష్ నాయక్ మాట్లాడుతూ.. ప్రజా ప్రభుత్వం నిర్వహించిన కులగణన అనంతరం బంజారా సమాజం తెలంగాణలో మూడవ అతిపెద్ద సామాజిక వర్గంగా ఉన్నప్పటికీ, జనాభా ప్రాతిపదికన తగిన రాజకీయ ప్రాధాన్యత, ప్రాతినిధ్యం ఎందుకు కల్పించడం లేదని ప్రశ్నించినట్లు తెలిపారు.

రాష్ట్ర మంత్రివర్గంలో బంజారా సమాజానికి తగిన ప్రాతినిధ్యం కల్పించడంతో పాటు, మైదాన ప్రాంత గిరిజనులకు చట్టసభల్లో సముచిత రాజకీయ ప్రాతినిధ్యం కల్పించాలని కోరినట్లు పేర్కొన్నారు.

అసెంబ్లీలో సమస్యలపై చర్చ జరగాలని డిమాండ్

మైదాన ప్రాంత గిరిజనుల సమస్యలు వారి రాజకీయ, సామాజిక, ఆర్థిక అభివృద్ధికి సంబంధించిన ముఖ్యమైన అంశాలని బంజారా సేవాదళ్ నాయకులు పేర్కొన్నారు. అందువల్ల అసెంబ్లీ వేదికగా ఈ సమస్యలపై చర్చ జరిగి, ప్రభుత్వం స్పష్టమైన కార్యాచరణ ప్రకటించేలా చూడాలని హరీష్ రావును కోరినట్లు తెలిపారు.

ఈ కార్యక్రమంలో బంజారా సేవాదళ్ రాష్ట్ర అధ్యక్షులు రఘురాం రాథోడ్, రాష్ట్ర ప్రధాన కార్యదర్శి నరేష్ నాయక్, ప్రధాన కార్యదర్శి కాట్రావత్ హనుమంతు నాయక్, రాష్ట్ర ఉపాధ్యక్షులు వేణు నాయక్, రాష్ట్ర కార్యదర్శి లక్ష్మణ్ నాయక్, రంగారెడ్డి జిల్లా వర్కింగ్ ప్రెసిడెంట్ పాపియా నాయక్, అధికార ప్రతినిధి ఇస్లావత్ సురేష్ నాయక్ తదితరులు పాల్గొన్నారు.

గమనిక: ఈ కథనం బంజారా సేవాదళ్ తెలంగాణ నాయకులు వెల్లడించిన వివరాల ఆధారంగా రూపొందించబడింది. ఇందులోని డిమాండ్లు, విమర్శలు, అభిప్రాయాలు సంబంధిత నాయకుల ప్రకటనలుగా మాత్రమే పరిగణించాలి.

0 మంది ఇష్టపడ్డారు
షేర్
డౌన్‌లోడ్న్యూస్ పేపర్ క్లిప్పింగ్ • హై క్వాలిటీ

మరిన్ని వార్తలు

వ్యాఖ్యానించండి