మల్కాజిగిరి పోలీస్‌ కమిషనరేట్‌ పరిధిలో గణేష్‌ ఉత్సవాలు, నిమజ్జనాలను ప్రశాంతంగా, సురక్షితంగా నిర్వహించేందుకు భారీ భద్రతా, ట్రాఫిక్‌, శాంతిభద్రతల ఏర్పాట్లు చేస్తున్నట్లు సీపీ సుమతి తెలిపారు.

“గణేష్‌ సురక్ష సంకల్ప్‌–2026” పేరుతో ప్రత్యేక కార్యక్రమాన్ని చేపట్టినట్లు ఆమె తెలిపారు. “మన గణేష్‌–మన భద్రత” అనే నినాదంతో భక్తులు, నిర్వాహకులు బాధ్యతగా, క్రమశిక్షణతో ఉత్సవాలు నిర్వహించాలని సీపీ సుమతి కోరారు.

15 వేలకు పైగా గణేష్‌ విగ్రహాలు ఏర్పాటు కానున్నట్లు అంచనా

మల్కాజిగిరి పోలీస్‌ కమిషనరేట్‌ పరిధిలో 15 వేలకు పైగా గణేష్‌ విగ్రహాలు ఏర్పాటు అవుతాయని అంచనా వేస్తున్నట్లు అధికారులు తెలిపారు. గత ఏడాదితో పోలిస్తే సుమారు 10 శాతం పెరుగుదల ఉంటుందని పేర్కొన్నారు.

గణేష్‌ మండపాల ఏర్పాటు కోసం నిర్వాహకులు తప్పనిసరిగా ఆన్‌లైన్‌లో సమాచారం లేదా దరఖాస్తు నమోదు చేయాలని సూచించారు. ఇప్పటివరకు కమిషనరేట్‌ పరిధిలో సుమారు 6,500 ఆన్‌లైన్‌ దరఖాస్తులు అందినట్లు సీపీ సుమతి తెలిపారు.

5,749 మందికి పైగా పోలీసులతో బందోబస్తు

ఉత్సవాల బందోబస్తు కోసం అన్ని స్థాయిలకు చెందిన 5,749 మందికి పైగా పోలీస్‌ సిబ్బంది విధుల్లో ఉంటారని సీపీ తెలిపారు. అదనంగా ఇతర జిల్లాలు, ప్రత్యేక విభాగాల నుంచి కూడా సిబ్బందిని రప్పించినట్లు పేర్కొన్నారు.

ట్రాఫిక్‌ నియంత్రణ కోసం సుమారు 1,200 మంది ట్రాఫిక్‌ సిబ్బంది విధుల్లో ఉంటారని తెలిపారు. కీలక జంక్షన్ల వద్ద ప్రత్యేక ఏర్పాట్లు చేస్తున్నట్లు చెప్పారు.

27 ప్రాంతాల్లో నిమజ్జన ఏర్పాట్లు

నిమజ్జనాల కోసం కమిషనరేట్‌ పరిధిలో సుమారు 27 చెరువులు, బేబీ పాండ్లు, తాత్కాలిక ట్యాంకులను గుర్తించినట్లు సీపీ తెలిపారు. 2025లో సుమారు 25 వేల విగ్రహాలు నిమజ్జనం కాగా, ఈ ఏడాది కూడా అంతే సంఖ్యలో నిమజ్జనాలు జరిగే అవకాశం ఉందని పేర్కొన్నారు.

5,000 సీసీ కెమెరాలు, AI ఆధారిత డ్రోన్‌ టెక్నాలజీ

నగర పరిధిలోకి వచ్చే నిమజ్జన ఊరేగింపులపై హైదరాబాద్‌ సిటీ పోలీసులతో సమన్వయం చేస్తూ 24 గంటల కంట్రోల్‌ రూమ్‌ పర్యవేక్షణ ఏర్పాటు చేసినట్లు సీపీ తెలిపారు.

భద్రత కోసం సుమారు 5,000 సీసీ కెమెరాలు, AI ఆధారిత డ్రోన్‌ టెక్నాలజీని వినియోగించనున్నట్లు చెప్పారు. ఊరేగింపులు, ట్రాఫిక్‌ రద్దీ, సున్నిత ప్రాంతాలను డ్రోన్ల ద్వారా పర్యవేక్షిస్తామని తెలిపారు.

2,200 మంది సహచరి వాలంటీర్లతో అవగాహన

“మీ సురక్ష–సహచరి” కార్యక్రమంలో భాగంగా 2,200 మంది సహచరి వాలంటీర్లు 552 గణేష్‌ మండపాల వద్ద పోలీసులతో కలిసి ప్రజలకు భద్రతపై అవగాహన కల్పించనున్నట్లు సీపీ తెలిపారు.

మండపాల వద్ద సీసీ కెమెరాలు ఏర్పాటు చేయాలని, అగ్నిమాపక, విద్యుత్‌, ట్రాఫిక్‌, శబ్ద కాలుష్య నిబంధనలు పాటించాలని నిర్వాహకులకు సూచించినట్లు చెప్పారు. డీజేలకు అనుమతి లేదని సీపీ సుమతి తెలిపారు.