ఎల్లారెడ్డి నియోజకవర్గానికి రూ.6.60 కోట్ల పంచాయతీ భవనాలు
33 గ్రామాల్లో కొత్త పంచాయతీ భవనాలు.. రూ.6.60 కోట్ల నిధులు మంజూరు
ఇవి కూడా చదవండి
పవార్ వార్త, కామారెడ్డి: ఎల్లారెడ్డి నియోజకవర్గంలోని 33 గ్రామాల్లో నూతన గ్రామ పంచాయతీ భవనాల నిర్మాణానికి రూ.6.60 కోట్ల నిధులు మంజూరయ్యాయి. ఒక్కో భవన నిర్మాణానికి రూ.20 లక్షల చొప్పున VB-G RAM G మెటీరియల్ కాంపోనెంట్ కింద 2026-27 ఆర్థిక సంవత్సరానికి పరిపాలనా అనుమతులు జారీ చేశారు.
కామారెడ్డి జిల్లా కలెక్టర్, జిల్లా కార్యక్రమ సమన్వయకర్త (DPC) 2026 నవంబర్ 2న ఈ మేరకు ఉత్తర్వులు జారీ చేశారు. జిల్లా పంచాయతీరాజ్ ఇంజినీర్ కామారెడ్డి ప్రతిపాదనలను పరిశీలించిన అనంతరం ఈ నిధులకు అనుమతి ఇచ్చారు.
ఆరు మండలాల్లో 33 గ్రామాలకు భవనాలు
ఎల్లారెడ్డి నియోజకవర్గంలోని సదాశివనగర్, తాడ్వాయి, నాగిరెడ్డిపేట, గాంధారి, రామారెడ్డి, ఎల్లారెడ్డి మండలాల్లో గ్రామ పంచాయతీ భవనాల నిర్మాణానికి నిధులు కేటాయించారు.
తాడ్వాయి మండలం: కృష్ణాజీవాడి, సంతాయిపేట, చిట్యాల గ్రామాల్లో భవనాలు నిర్మించనున్నారు.
సదాశివనగర్ మండలం: భూంపల్లి, యాచారం, మార్కల్, వజ్జేపల్లి తండా, సజ్జానాయక్ తండా గ్రామాలకు నిధులు మంజూరయ్యాయి.
నాగిరెడ్డిపేట మండలం: బంజారా తండా, మాతూర్, చిన్న ఆత్మకూర్, వాడి గ్రామాల్లో నిర్మాణాలు చేపట్టనున్నారు.
గాంధారి మండలం: బ్రాహ్మణపల్లి, గాంధీవేట్ తండా, గుర్జాల్ తండా, కైతీ తండా, మాధవపల్లి, మొండిసడక్ నర్సాపూర్, పరమళ్ల తండా, రాంపూర్ గడ్డ, తిమ్మాపూర్ గ్రామాల్లో భవనాలు నిర్మించనున్నారు.
రామారెడ్డి మండలం: ఇస్సన్నపల్లి, కన్నాపూర్ తండా గ్రామాలకు నిధులు కేటాయించారు.
ఎల్లారెడ్డి మండలం: సోమర్పేట్, సబ్దల్పూర్, అన్నాసాగర్, మౌలన్ఖేడ్, కొకొండ, సోమర్యాగడి తండా, తిమ్మారెడ్డి తండా, హాజీపూర్ తండా, వెంకటాపూర్, బ్రాహ్మణపల్లి గ్రామాల్లో కొత్త పంచాయతీ భవనాలు నిర్మించనున్నారు.
VB-G RAM G నిధులతో నిర్మాణాలు
గ్రామీణ మౌలిక సదుపాయాల అభివృద్ధిలో భాగంగా గ్రామ పంచాయతీ భవనాలు, వీఓ భవనాలు, అంగన్వాడీ భవనాలు, పాఠశాల మరుగుదొడ్లు, కిచెన్ షెడ్ల నిర్మాణానికి VB-G RAM G మెటీరియల్ కాంపోనెంట్ కింద పనులు చేపట్టాలని ప్రభుత్వం నిర్ణయించింది.
మంజూరైన పనులను సంబంధిత VB-G RAM G మార్గదర్శకాలకు అనుగుణంగా చేపట్టి త్వరితగతిన పూర్తి చేయాలని జిల్లా పంచాయతీరాజ్ ఇంజినీర్ను కలెక్టర్ ఆదేశించారు.
















