హైదరాబాద్, అల్వాల్: అల్వాల్ పోలీస్ స్టేషన్ పరిధిలోని మచ్చ బొల్లారం పెద్ది ఫార్మారెడ్డి కాలనీలో శ్రీనివాస్ (52) అనే వ్యక్తి హత్యకు గురయ్యాడు. కుటుంబ కలహాల నేపథ్యంలో భార్య, ఇద్దరు పిల్లలు కలిసి గొడ్డలితో దాడి చేసినట్లు పోలీసులు తెలిపారు. ఈ ఘటనలో తీవ్రంగా గాయపడిన శ్రీనివాస్ అక్కడికక్కడే మృతి చెందాడు.

మచ్చ బొల్లారంలోని పెద్ది ఫార్మారెడ్డి కాలనీలో శ్రీనివాస్, రమాదేవి దంపతులు ఆరు నెలలుగా నివసిస్తున్నారు. కొంతకాలంగా కుటుంబ సభ్యుల మధ్య తరచూ గొడవలు జరుగుతున్నట్లు సమాచారం. ఈ క్రమంలో ఆదివారం రాత్రి మరోసారి కుటుంబ సభ్యుల మధ్య గొడవ జరిగినట్లు తెలుస్తోంది.

భార్య, ఇద్దరు పిల్లలపై హత్య ఆరోపణలు

కుటుంబ కలహాల నేపథ్యంలో రమాదేవి తన కుమారుడు నిఖిల్, కుమార్తెతో కలిసి శ్రీనివాస్‌పై గొడ్డలితో దాడి చేసినట్లు పోలీసులు తెలిపారు. దాడిలో తీవ్ర గాయాలైన శ్రీనివాస్ ఘటనా స్థలంలోనే ప్రాణాలు కోల్పోయాడు.

ముగ్గురిని అదుపులోకి తీసుకున్న పోలీసులు

సమాచారం అందుకున్న అల్వాల్ పోలీసులు ఘటనా స్థలానికి చేరుకుని పరిశీలించారు. హత్యకు సంబంధించిన ఆధారాలను సేకరించి కేసు నమోదు చేశారు.

ఈ ఘటనకు సంబంధించి శ్రీనివాస్ భార్య రమాదేవి, కుమారుడు నిఖిల్, కుమార్తెను పోలీసులు అదుపులోకి తీసుకున్నారు. కుటుంబ కలహాలే హత్యకు కారణమా, ఇతర కారణాలేమైనా ఉన్నాయా అనే కోణాల్లో దర్యాప్తు చేస్తున్నారు.