పీర్జాదిగూడ: భవానీనగర్ కాలనీలో గణేష్ నవరాత్రి ఉత్సవాల ముగింపు సందర్భంగా గణేష్ నిమజ్జన కార్యక్రమాన్ని కాలనీ అసోసియేషన్ సభ్యులు, భక్తులు ఘనంగా నిర్వహించారు. తొమ్మిది రోజుల పాటు భక్తిశ్రద్ధలతో ప్రత్యేక పూజలు, వివిధ ఆధ్యాత్మిక కార్యక్రమాలు నిర్వహించిన అనంతరం గణనాథుడికి ఘనంగా వీడ్కోలు పలికారు.

ఈ సందర్భంగా గణనాథుడికి సమర్పించిన లడ్డూను వేలం పాట నిర్వహించగా, శిరీష రూ.45 వేలకు లడ్డూను దక్కించుకున్నారు. అనంతరం డీజే పాటలతో మహిళలు, యువత ఉత్సాహంగా నృత్యాలు చేస్తూ నిమజ్జన వేడుకల్లో పాల్గొన్నారు. కాలనీలో పండుగ వాతావరణం నెలకొంది.

ప్రతి సంవత్సరం గణనాథుడి విగ్రహం ఎత్తును పెంచుతూ వస్తున్నామని అసోసియేషన్ సభ్యులు తెలిపారు. ఇందులో భాగంగా ఈ ఏడాది 9 అడుగుల గణనాథుడిని ప్రతిష్ఠించి తొమ్మిది రోజుల పాటు ప్రత్యేక పూజలు నిర్వహించినట్లు పేర్కొన్నారు. భక్తులు పెద్ద సంఖ్యలో పాల్గొని స్వామివారిని దర్శించుకుని మొక్కులు చెల్లించుకున్నారు.

గణేష్ నవరాత్రి ఉత్సవాలు కాలనీవాసుల ఐక్యతకు ప్రతీకగా నిలుస్తున్నాయని అసోసియేషన్ సభ్యులు తెలిపారు. ప్రతి సంవత్సరం గణేష్ నవరాత్రులతో పాటు దుర్గా నవరాత్రి ఉత్సవాలను కూడా అందరి సహకారంతో ఘనంగా నిర్వహించుకుంటామని చెప్పారు. భక్తి, సామాజిక ఐక్యతను పెంపొందించేలా ఉత్సవాలను నిర్వహిస్తున్నామని తెలిపారు.

తొమ్మిది రోజుల పాటు ఉత్సవాలను విజయవంతంగా నిర్వహించిన అనంతరం నిమజ్జన కార్యక్రమాన్ని కూడా అదే ఉత్సాహంతో నిర్వహించామని అసోసియేషన్ సభ్యులు పేర్కొన్నారు. ఈ కార్యక్రమంలో భవానీనగర్ కాలనీ వెల్ఫేర్ సొసైటీ అధ్యక్షుడు టి. నరేష్, ఉపాధ్యక్షుడు కిరణ్, ప్రధాన కార్యదర్శి విక్రమ్, కోశాధికారి సత్యనారాయణ, అడ్వైజర్ శ్రీనివాస్ రావు తదితరులు పాల్గొన్నారు.