మహబూబాబాద్ జిల్లా డోర్నకల్ మండల పరిధిలోని మండల పరిషత్ ప్రాథమిక పాఠశాల (MPPS), కస్తూర్భా గాంధీ బాలికా విద్యాలయాన్ని జిల్లా కలెక్టర్ స్నేహ శబరీష్ శుక్రవారం ఆకస్మికంగా తనిఖీ చేశారు.

ఈ సందర్భంగా కలెక్టర్ తరగతి గదులకు వెళ్లి విద్యార్థులతో ముచ్చటించారు. వారి సబ్జెక్టుల పరిజ్ఞానం, చదివే-రాసే నైపుణ్యాలు, అభ్యాస సామర్థ్యాలను స్వయంగా పరిశీలించారు. అనంతరం ఉపాధ్యాయులకు పలు సూచనలు చేశారు.

LEAP ప్రోగ్రామ్ అమలుపై అధికారులకు సూచనలు

పాఠశాలలో LEAP ప్రోగ్రామ్ ద్వారా ఇంగ్లీష్ భాషా నైపుణ్యాల పెంపు కార్యక్రమాన్ని అమలు చేయకపోవడంపై సంబంధిత ఎం.ఈ.ఓపై కలెక్టర్ ఆగ్రహం వ్యక్తం చేశారు.

విద్యార్థులకు ఇంగ్లీష్ భాషపై పట్టు సాధించేలా “Active Participation” (చురుకైన భాగస్వామ్యం) పద్ధతుల ద్వారా బోధన అందించాలని అధికారులను, ఉపాధ్యాయులను ఆదేశించారు. కేవలం పుస్తకాలకే పరిమితం కాకుండా విద్యార్థులను స్వయంగా భాగస్వాములను చేస్తూ భాషా నైపుణ్యాలను పెంపొందించాలని సూచించారు.

పాఠశాల ఆవరణ, తాగునీటి వసతి, మరుగుదొడ్ల నిర్వహణను నిరంతరం శుభ్రంగా ఉంచాలని, విద్యార్థులకు ఎలాంటి ఇబ్బందులు కలగకుండా చూడాలని అధికారులను ఆదేశించారు.

ఉపాధ్యాయుల హాజరు శాతాన్ని, విద్యార్థుల ప్రగతి నివేదికలను పరిశీలించిన కలెక్టర్.. వెనుకబడిన విద్యార్థులపై ప్రత్యేక శ్రద్ధ పెట్టాలని సూచించారు.

కస్తూర్భా గాంధీ బాలికా విద్యాలయంలో తనిఖీ

అనంతరం డోర్నకల్ కస్తూర్భా గాంధీ బాలికా విద్యాలయాన్ని కలెక్టర్ తనిఖీ చేశారు. తరగతి గదులను సందర్శించి విద్యార్థినులతో మాట్లాడి వారి చదువు, సమస్యలను అడిగి తెలుసుకున్నారు.

విద్యార్థినుల హాజరు శాతం, రికార్డులను పరిశీలించారు. వారి విద్యా నైపుణ్యాలను మెరుగుపరచడానికి ఉపాధ్యాయులు ప్రత్యేక శ్రద్ధ తీసుకోవాలని సూచించారు.

విద్యార్థినులకు మెనూ ప్రకారం పౌష్టికాహారం, మధ్యాహ్న భోజనం అందించాలని సంబంధిత అధికారులను ఆదేశించారు.

విద్యార్థులకు ఉపాధ్యాయులు పాఠ్యాంశాలను వివరంగా అర్థమయ్యే పద్ధతిలో బోధించాలని, ఇంగ్లీష్ భాషపై పట్టు సాధించేలా ప్రతి అంశాన్ని వివరంగా బోధించాలని సూచించారు. విద్యార్థినుల ఉన్నత చదువుల లక్ష్యాల గురించి అడిగి తెలుసుకుని వారిని ప్రోత్సహించారు.

తనిఖీలో పాల్గొన్న అధికారులు

ఈ తనిఖీలో ఇంచార్జ్ డి.ఈ.ఓ ఎం. శ్రీరాములు, జి.ఈ.సి.ఓ గాయత్రి, ఎం.ఈ.ఓ అంగోత్ లక్ష్మా, కేజీబీవీ స్పెషల్ అధికారి షేక్ మున్ని, డోర్నకల్ ఎం.ఆర్.ఓ రాఘవ రెడ్డి, మునిసిపల్ వైస్ చైర్మెన్ మాద లావణ్య, శ్రీనివాస్, మునిసిపాలిటీ మేనేజర్ నరసింహ మూర్తి తదితరులు పాల్గొన్నారు.