ఆరు గ్యారెంటీలు, 420 హామీలతో అధికారంలోకి వచ్చిన కాంగ్రెస్ ప్రభుత్వం వెయ్యి రోజుల పాలనలో ప్రజలను దగా చేసిందని కామారెడ్డి మాజీ ఎమ్మెల్యే గంప గోవర్ధన్ విమర్శించారు. ప్రభుత్వ వైఫల్యాలను ప్రజల్లోకి తీసుకెళ్లేందుకు బీఆర్ఎస్ పార్టీ ఆధ్వర్యంలో కామారెడ్డి మున్సిపల్ కార్యాలయం ఎదుట నిరసన కార్యక్రమం నిర్వహించారు.

ఈ కార్యక్రమంలో భాగంగా మున్సిపల్ కార్యాలయం ఎదుట సుమారు 420 అడుగుల భారీ బ్యానర్‌ను ప్రదర్శిస్తూ ప్రభుత్వానికి వ్యతిరేకంగా నిరసన వ్యక్తం చేశారు. నియోజకవర్గంలోని వివిధ ప్రాంతాల నుంచి బీఆర్ఎస్ నాయకులు, కార్యకర్తలు పెద్ద సంఖ్యలో తరలివచ్చారు.

ప్రభుత్వం ఇచ్చిన హామీలను నెరవేర్చకుండా ప్రజలను ఇబ్బందులకు గురిచేస్తోందని ఆయన మండిపడ్డారు. ప్రజలకు ఎదురవుతున్న సమస్యలు, ప్రభుత్వ విధానాల వల్ల కలుగుతున్న ఇబ్బందులను ఈ నిరసన ద్వారా ఎత్తిచూపామని తెలిపారు.

ప్రభుత్వం తన వైఖరిని మార్చుకుని ప్రజలకు ఇచ్చిన హామీలను వెంటనే అమలు చేయాలని డిమాండ్ చేశారు. ప్రజల సమస్యల పరిష్కారం కోసం బీఆర్ఎస్ పార్టీ నిరంతరం పోరాటం చేస్తుందని, అవసరమైతే ప్రభుత్వంపై మరింత ఒత్తిడి తీసుకువస్తామని స్పష్టం చేశారు.

ఇంటింటికీ తిరిగి కరపత్రాల పంపిణీ

నిరసన కార్యక్రమం అనంతరం కౌన్సిలర్ ప్రభాకర్ యాదవ్ వార్డులో బీఆర్ఎస్ నాయకులు, కార్యకర్తలు ఇంటింటికీ తిరుగుతూ ప్రభుత్వ వైఫల్యాలను వివరిస్తూ కరపత్రాలను పంపిణీ చేశారు. ప్రజలకు ఇచ్చిన హామీలు, వాటి అమలులో చోటుచేసుకున్న జాప్యంపై ప్రజలకు వివరించారు.

పాల్గొన్న నాయకులు, కార్యకర్తలు