ప్రజా సమస్యల పరిష్కారమే ప్రథమ ప్రాధాన్యత

శేరిలింగంపల్లి నియోజకవర్గంలో ప్రజలు ఎదుర్కొంటున్న మౌలిక వసతుల సమస్యలను పరిష్కరించడమే తమ ప్రథమ ప్రాధాన్యత అని టీపీసీసీ రాష్ట్ర ప్రధాన కార్యదర్శి, శేరిలింగంపల్లి నియోజకవర్గ కాంగ్రెస్ పార్టీ ఇన్‌చార్జ్ వి. జగదీశ్వర్ గౌడ్ అన్నారు.

ప్రజావాణి కార్యక్రమంలో భాగంగా శేరిలింగంపల్లి నియోజకవర్గంలోని పలు కాలనీలకు చెందిన ప్రజలు, నాయకులతో కలిసి సైబరాబాద్ మున్సిపల్ కమిషనర్‌ను జగదీశ్వర్ గౌడ్ కలిశారు.

ఈ సందర్భంగా నియోజకవర్గంలోని వివిధ కాలనీలలో నెలకొన్న మౌలిక వసతుల సమస్యలను కమిషనర్‌కు వివరించి, వాటి పరిష్కారానికి తక్షణ చర్యలు తీసుకోవాలని కోరుతూ వినతిపత్రం అందజేశారు.

కాలనీలలో ప్రజలకు ఇబ్బందులు కలిగిస్తున్న రోడ్ల సమస్యలు, వీధి దీపాలు, పార్కుల అభివృద్ధి, శ్మశానవాటికల అభివృద్ధి, ఇతర మౌలిక వసతుల సమస్యలపై అధికారులకు తగిన ఆదేశాలు జారీ చేయాలని జగదీశ్వర్ గౌడ్ కమిషనర్‌ను కోరారు.

ప్రజలు ఎదుర్కొంటున్న సమస్యలను ప్రాధాన్యత క్రమంలో గుర్తించి, వాటిని త్వరితగతిన పరిష్కరించేలా అధికారులు చర్యలు తీసుకోవాలని ఆయన విజ్ఞప్తి చేశారు.

ప్రజలకు మెరుగైన మౌలిక వసతులు కల్పించేందుకు నిరంతరం అందుబాటులో ఉంటామని జగదీశ్వర్ గౌడ్ తెలిపారు.

ఈ కార్యక్రమంలో నాయకులు సయ్యద్ గౌడ్, మన్నేపల్లి సాంబశివరావు, కావూరి ప్రసాద్, పట్వారీ శశిధర్, రాజేష్, కటారి వెంకట్, సయ్యద్ తాహెర్ హుస్సేన్, శ్రీను నాయక్ తదితరులు పాల్గొన్నారు.