స్మార్ట్ మీటర్లపై తెలంగాణ రక్షణ సేన అభ్యంతరం

కేంద్రం తెచ్చిన కొత్త పథకంపై సంతకం పెట్టి రాష్ట్రంలో స్మార్ట్ మీటర్లు పెట్టే ప్రయత్నం రేవంత్ రెడ్డి ప్రభుత్వం చేస్తోందని తెలంగాణ రక్షణ సేన చీఫ్ కల్వకుంట్ల కవిత ఆరోపించారు.

గతంలో రైతులను ఇబ్బంది పెట్టేలా చేసిన నల్ల చట్టాల్లో భాగంగా తేవాలనుకున్న స్మార్ట్ మీటర్లను మళ్లీ తేవాలని కేంద్రం చేస్తున్న ప్రయత్నాలకు రేవంత్ సర్కార్ మద్దతు ఇస్తోందని ఆమె విమర్శించారు.

అదానీ వ్యాపారాన్ని ప్రోత్సహించేందుకు, ప్రజలకు నష్టం చేసేందుకు స్మార్ట్ మీటర్లను తీసుకొస్తున్నారని కవిత ఆరోపించారు. ప్రజల మైండ్ వాష్ చేసేందుకు ఇటీవల నెక్లెస్ రోడ్‌లో డెమో కార్యక్రమం నిర్వహించారని ఆమె పేర్కొన్నారు.

ఎలక్ట్రిసిటీ డిపార్ట్‌మెంట్ సీఎండీ కూడా స్మార్ట్ మీటర్లు తీసుకొస్తున్నామని చెప్పారని ఆమె అన్నారు. గతంలో రైతుల బావుల వద్ద ఉన్న మోటార్లకు మీటర్లు పెట్టే అంశంపై అభ్యంతరాలు వ్యక్తం చేసిన విషయాన్ని కూడా గుర్తు చేశారు.

ప్రస్తుతం తెలంగాణలో ఉన్న మీటర్లు కూడా స్మార్ట్ మీటర్లేనని, అయితే కొత్తగా తీసుకురావాలని చూస్తున్న స్మార్ట్ మీటర్ల వల్ల ప్రజలకు మరింత నష్టం ఉంటుందని కవిత పేర్కొన్నారు.

కొత్త విధానంలో ముందుగానే ఫోన్‌లో రీఛార్జ్ చేసుకున్నట్లుగా విద్యుత్ రీఛార్జ్ చేసుకోవాల్సి ఉంటుందని, రీఛార్జ్ అయిపోతే విద్యుత్ సరఫరా నిలిచిపోయే అవకాశం ఉంటుందని ఆమె వివరించారు.

ఉత్తరప్రదేశ్‌లో ఇదే విధంగా మీటర్లు ఏర్పాటు చేసినప్పుడు ప్రజలు వాటిని తీసి ఎలక్ట్రిసిటీ డిపార్ట్‌మెంట్ కార్యాలయాల్లో వేసి వెళ్తున్నారని ఆమె పేర్కొన్నారు.

స్మార్ట్ మీటర్ల కారణంగా ప్రభుత్వం ఇస్తామన్న 200 యూనిట్ల ఉచిత విద్యుత్, సెలూన్లకు ఇచ్చే ఉచిత విద్యుత్, ఎస్సీ, ఎస్టీలకు అందించే సబ్సిడీ విద్యుత్‌పై ప్రభావం పడే ప్రమాదం ఉందని కవిత ఆరోపించారు.

తెలంగాణలో ప్రస్తుతం ఉన్న మీటర్ల ద్వారానే 24 గంటల విద్యుత్ అందించేందుకు ప్రభుత్వం ప్రయత్నించాలని, విద్యుత్ సరఫరా వ్యవస్థను మెరుగుపరచాలని ఆమె కోరారు.

ఆటిజన్లు, కాంట్రాక్ట్ కార్మికులను రెగ్యులరైజ్ చేసి విద్యుత్ సరఫరా బాగా ఉండేలా చూడాలని, ప్రజల జేబులకు భారం కలిగించే కార్యక్రమాల కంటే వారికి మేలు చేసే నిర్ణయాలు తీసుకోవాలని ఆమె సూచించారు.