పవార్ వార్త, కామారెడ్డి: తెలంగాణలో బీసీ వర్గీకరణపై సమగ్ర సమీక్ష చేపట్టాలని తెలంగాణ ముదిరాజ్ ప్రభుత్వ ఉద్యోగుల సంఘం రాష్ట్ర ఉపాధ్యక్షుడు డాక్టర్ భట్టు విఠల్ ముదిరాజ్ డిమాండ్ చేశారు. 1970లో రూపొందించిన బీసీ వర్గీకరణకు కాలానుగుణంగా సమీక్ష జరగలేదని, ప్రస్తుత సామాజిక, ఆర్థిక పరిస్థితులకు అనుగుణంగా రిజర్వేషన్ విధానాన్ని పరిశీలించాల్సిన అవసరం ఉందని ఆయన అభిప్రాయపడ్డారు.
56 ఏళ్ల వర్గీకరణపై సమీక్ష అవసరం
ఉమ్మడి ఆంధ్రప్రదేశ్లో అనంతరామన్ కమిషన్ సిఫార్సుల ఆధారంగా 1970లో బీసీలను నాలుగు గ్రూపులుగా విభజించారు. జీవో ఎంఎస్ నంబర్ 1793, సెప్టెంబర్ 23, 1970 ద్వారా విద్యా ప్రవేశాల్లో 25 శాతం రిజర్వేషన్ కేటాయించారు. బీసీ-ఏకు 7 శాతం, బీసీ-బీకు 10 శాతం, బీసీ-సీకు 1 శాతం, బీసీ-డీకు 7 శాతం కేటాయింపులు జరిగాయి.
ఇవి కూడా చదవండి
గ్రూపుల ఏర్పాటు సమయంలో కులాల సామాజిక పరిస్థితులు, సంప్రదాయ వృత్తులు, వెనుకబాటుతనాన్ని పరిగణనలోకి తీసుకున్నారని భట్టు విఠల్ పేర్కొన్నారు. అయితే ఐదు దశాబ్దాల కాలంలో విద్య, ఉపాధి, పట్టణీకరణ, వృత్తి పరిస్థితుల్లో మార్పులు వచ్చాయని, వాటిని ప్రస్తుత వర్గీకరణలో ప్రతిబింబించాల్సిన అవసరం ఉందన్నారు.
తెలంగాణ సామాజిక పరిస్థితులకు అనుగుణంగా అంచనా
2014లో తెలంగాణ రాష్ట్రం ఏర్పడిన తర్వాత కులాల భౌగోళిక విస్తరణ, జనాభా కూర్పు, సామాజిక, ఆర్థిక పరిస్థితుల్లో మార్పులు చోటుచేసుకున్నాయని ఆయన అభిప్రాయపడ్డారు. ఉమ్మడి రాష్ట్రం నుంచి కొనసాగుతున్న వర్గీకరణను తెలంగాణ ప్రత్యేక సామాజిక పరిస్థితుల ఆధారంగా తిరిగి పరిశీలించాలని కోరారు.
ఇప్పటికే ఉన్న బీసీ గ్రూపుల్లో తమ కులాలకు తగిన గుర్తింపు, రిజర్వేషన్ ప్రయోజనాలు అందడం లేదని కొన్ని కులాల నుంచి డిమాండ్లు వస్తున్నాయని పేర్కొన్నారు. అయితే ఏ కులం ఎంత వెనుకబడిందనే అంశాన్ని విశ్వసనీయమైన గణాంకాలు, విద్యా, ఉద్యోగ అవకాశాల ఆధారంగా అంచనా వేయాలని సూచించారు.
SEEEPC-2024 డేటాతో సమీక్షకు అవకాశం
తెలంగాణ ప్రభుత్వం నిర్వహించిన సామాజిక, ఆర్థిక, విద్య, ఉపాధి, రాజకీయ, కుల సర్వే (SEEEPC-2024) బీసీ వర్గీకరణ సమీక్షకు ఉపయోగపడుతుందని భట్టు విఠల్ పేర్కొన్నారు. ఈ సర్వేలో కులాల వారీగా విద్య, వృత్తి, ఆస్తులు, జీవన ప్రమాణాలు, సేవలకు ప్రాప్యత వంటి అంశాలపై సమాచారం సేకరించారని తెలిపారు.
సర్వేలోని కాంపోజిట్ బ్యాక్వర్డ్నెస్ ఇండెక్స్ (CBI) ద్వారా కులాల మధ్య సాపేక్ష వెనుకబాటుతనాన్ని పరిశీలించవచ్చని అభిప్రాయపడ్డారు. అయితే ఈ సూచికను ఒక్కటే ఆధారంగా తీసుకోకుండా విద్యా ప్రవేశాలు, ప్రభుత్వ ఉద్యోగాలు, ఆదాయం, ప్రాతినిధ్యం వంటి అంశాలతో పోల్చి చూడాలని సూచించారు.
స్వతంత్ర కమిషన్ ఏర్పాటు చేయాలని సూచన
బీసీ వర్గీకరణపై సమీక్ష కోసం సామాజిక శాస్త్రవేత్తలు, ఆర్థికవేత్తలు, గణాంక నిపుణులు, విద్యా, రాజ్యాంగ నిపుణులతో స్వతంత్ర కమిషన్ ఏర్పాటు చేయాలని భట్టు విఠల్ సూచించారు. ఆ కమిషన్ SEEEPC-2024 డేటాను విశ్లేషించి, గ్రూపులు, కులాల వారీగా రిజర్వేషన్ ప్రయోజనాల వినియోగాన్ని పరిశీలించాలని కోరారు.
బీసీ సంఘాలు, కుల సంఘాలు, విద్యావేత్తలు, న్యాయ నిపుణులు, గ్రామీణ ప్రజలకు అభిప్రాయాలు వెల్లడించే అవకాశం కల్పించాలని అన్నారు. కమిషన్ నివేదికను ప్రజా చర్చకు విడుదల చేసి, చట్టపరమైన పరిశీలన అనంతరం ప్రభుత్వం నిర్ణయం తీసుకోవాలని సూచించారు.
బీసీ వర్గీకరణపై చర్చ కులాల మధ్య పోటీగా మారకూడదని, నిజంగా వెనుకబడిన వర్గాలకు విద్య, ఉద్యోగాలు, ప్రజా జీవితంలో సమాన అవకాశాలు అందేలా చూడటమే సమీక్ష లక్ష్యంగా ఉండాలని డాక్టర్ భట్టు విఠల్ ముదిరాజ్ పేర్కొన్నారు.
















