పీడీఎస్ బియ్యం అక్రమ రవాణా భగ్నం.. 30 టన్నుల బియ్యం స్వాధీనం

కామారెడ్డి: పేద ప్రజలకు ప్రభుత్వం అందించే పీడీఎస్ (PDS) బియ్యాన్ని అక్రమంగా తరలిస్తున్న లారీని కామారెడ్డి జిల్లా పిట్లం పోలీసులు పట్టుకున్నారు. పోలీసులు నిర్వహించిన వాహన తనిఖీల్లో సుమారు 30 టన్నుల పీడీఎస్ బియ్యం పట్టుబడింది.

పిట్లం చౌరస్తా వద్ద లారీ తనిఖీ

జిల్లా పోలీస్ కార్యాలయం విడుదల చేసిన వివరాల ప్రకారం.. పిట్లం పోలీసులకు అందిన సమాచారం మేరకు ఎస్సై ఆంజనేయులు తన సిబ్బంది వెంకటేష్, రాజేశ్వర్‌లతో కలిసి పిట్లం చౌరస్తా సమీపంలోని ఫ్లైఓవర్ వద్ద వాహనాల తనిఖీలు చేపట్టారు.

ఈ క్రమంలో హైదరాబాద్ నుంచి నాందేడ్ వైపు వెళ్తున్న GJ-25-U-7022 నంబర్ గల లారీని పోలీసులు ఆపి తనిఖీ చేశారు. లారీలో 632 పాలిథిన్ కవర్లలో నింపిన సుమారు 30 టన్నుల పీడీఎస్ బియ్యం ఉన్నట్లు గుర్తించారు.

దీంతో పోలీసులు బియ్యంతో పాటు లారీని స్వాధీనం చేసుకుని తదుపరి చర్యలు చేపట్టారు.

ముగ్గురిపై కేసు నమోదు

ఈ ఘటనకు సంబంధించి లారీ డ్రైవర్లు పర్బత్ కరంటా దేవరాజ్ (52), శరద్ ఆబా బచ్‌కర్తో పాటు బియ్యం తరలిస్తున్నట్లు పేర్కొన్న ఇబ్రహీంపై పోలీసులు కేసు నమోదు చేశారు.

కేసు నమోదు చేసిన పోలీసులు ఘటనకు సంబంధించిన పూర్తి వివరాలపై దర్యాప్తు కొనసాగిస్తున్నట్లు తెలిపారు.

పోలీసులను అభినందించిన జిల్లా ఎస్పీ

పీడీఎస్ బియ్యం అక్రమ రవాణాను సమర్థవంతంగా అడ్డుకుని బియ్యాన్ని స్వాధీనం చేసుకున్న పిట్లం ఎస్సై ఆంజనేయులు, పోలీసు సిబ్బంది వెంకటేష్, రాజేశ్వర్‌లను కామారెడ్డి జిల్లా ఎస్పీ ఎం. రాజేష్ చంద్ర, ఐపీఎస్ ప్రత్యేకంగా అభినందించారు.

అక్రమ రవాణాదారులకు పోలీసుల హెచ్చరిక

పేద ప్రజలకు చేరాల్సిన రేషన్ బియ్యాన్ని అక్రమంగా తరలించడం, అక్రమంగా నిల్వ చేయడం లేదా బ్లాక్ మార్కెట్‌కు తరలించే వారిపై చట్టపరమైన కఠిన చర్యలు తప్పవని పోలీసులు హెచ్చరించారు.

ప్రభుత్వ రేషన్ బియ్యం అక్రమ రవాణాపై సమాచారం ఉంటే సంబంధిత అధికారులకు తెలియజేయాలని పోలీసులు సూచించారు. అక్రమ రవాణాను అడ్డుకునేందుకు తనిఖీలు మరింత కట్టుదిట్టం చేస్తామని తెలిపారు.