బాలల దినోత్సవ వారోత్సవాలు.. చిన్నారులకు సృజనాత్మక పోటీలు
పిల్లల్లో ఆత్మవిశ్వాసం పెంచేలా ప్రత్యేక కార్యక్రమాలు
ఇవి కూడా చదవండి
పవార్ వార్త, చెంగిచెర్ల: బాలల్లో దాగి ఉన్న సృజనాత్మక ప్రతిభను వెలికితీసేందుకు మేడ్చల్–మల్కాజిగిరి జిల్లా మహిళా, శిశు సంక్షేమ శాఖ ఆధ్వర్యంలో చిత్రలేఖనం, డ్రాయింగ్, వ్యాసరచన పోటీలు నిర్వహించారు. బాలల దినోత్సవ వారోత్సవాల్లో భాగంగా మంగళవారం చెంగిచెర్లలోని చెరిష్ ఫౌండేషన్ చైల్డ్ కేర్ ఇన్స్టిట్యూషన్లో ఈ కార్యక్రమం జరిగింది.
నవంబర్ 14 నుంచి 20వ తేదీ వరకు నిర్వహిస్తున్న బాలల దినోత్సవ వారోత్సవాల్లో భాగంగా బాలబాలికలకు వివిధ పోటీలు ఏర్పాటు చేశారు. పెయింటింగ్, డ్రాయింగ్, వ్యాసరచన ద్వారా తమ ఆలోచనలను, సృజనాత్మకతను వ్యక్తపరిచే అవకాశం కల్పించారు.
పిల్లల్లో దాగి ఉన్న ప్రతిభను గుర్తించాలి
ఈ సందర్భంగా బాలల సంక్షేమ కమిటీ సభ్యురాలు నాగ జయశ్రీ మాట్లాడుతూ ప్రతి బాలుడిలోనూ ప్రత్యేకమైన ప్రతిభ, సృజనాత్మకత దాగి ఉంటాయని చెప్పారు. వాటిని గుర్తించి ప్రోత్సహించాల్సిన బాధ్యత సమాజంపై ఉందన్నారు. ఇలాంటి కార్యక్రమాల ద్వారా పిల్లలకు తమలోని నైపుణ్యాలను ప్రదర్శించేందుకు అవకాశాలు కల్పించాలని సూచించారు. పోటీల్లో పాల్గొనడం ద్వారా వారిలో ఆత్మవిశ్వాసం పెరుగుతుందని, భవిష్యత్తులో సమాజ అభివృద్ధిలో భాగస్వాములయ్యేందుకు దోహదపడుతుందని పేర్కొన్నారు.
సృజనాత్మక ఆలోచనలకు ప్రోత్సాహం
ప్రొటెక్షన్ ఆఫీసర్ (ఇన్స్టిట్యూషనల్ కేర్) సుజాత మాట్లాడుతూ చిత్రలేఖనం, వ్యాసరచన వంటి పోటీలు పిల్లల్లో సృజనాత్మకతతో పాటు ఆత్మవిశ్వాసం, ఆలోచనా శక్తిని పెంపొందిస్తాయని తెలిపారు. బాలల వ్యక్తిగత నైపుణ్యాలను గుర్తించి వారికి తగిన ప్రోత్సాహం అందించడం అవసరమని చెప్పారు.
ఈ కార్యక్రమంలో చెరిష్ ఫౌండేషన్ వ్యవస్థాపకుడు డేవిడ్, సిబ్బంది ఝాన్సీ, రమేష్, సంస్థ సిబ్బంది, బాలబాలికలు పాల్గొన్నారు.











