ఎల్లారెడ్డి: రాష్ట్రంలో వ్యవసాయ విద్యను బలోపేతం చేసేందుకు కాంగ్రెస్ ప్రభుత్వం తీసుకుంటున్న చర్యలు అభినందనీయమని ఎల్లారెడ్డి ఎమ్మెల్యే మదన్ మోహన్ అన్నారు. శాసనసభ సమావేశాల్లో వ్యవసాయ విద్య, ప్రభుత్వ వ్యవసాయ పాలిటెక్నిక్ కళాశాలల బలోపేతం, విద్యార్థులకు మెరుగైన వసతులు వంటి అంశాలపై తాను మాట్లాడినట్లు ఆయన తెలిపారు.

రైతు బిడ్డలకు నాణ్యమైన వ్యవసాయ విద్య అందించాలన్నదే ప్రభుత్వ లక్ష్యమని ఎమ్మెల్యే మదన్ మోహన్ పేర్కొన్నారు. రైతు కుటుంబాల పిల్లలు భవిష్యత్తులో వ్యవసాయ శాస్త్రవేత్తలుగా ఎదగాలంటే వ్యవసాయ విద్యకు బలమైన పునాది అవసరమని అన్నారు.

మాల్తుమ్మెద పాలిటెక్నిక్‌ను పునరుద్ధరించాలని విజ్ఞప్తి

కామారెడ్డి జిల్లాలోని మాల్తుమ్మెదలో 2014లో ఏర్పాటు చేసిన వ్యవసాయ పాలిటెక్నిక్ కళాశాలను విద్యార్థుల సంఖ్య తక్కువగా ఉండటం, వసతుల మెరుగుదల కోసం తాత్కాలికంగా సిద్ధిపేట జిల్లా తొర్నాలకు తరలించిన విషయాన్ని ప్రభుత్వం దృష్టికి తీసుకెళ్లినట్లు ఎమ్మెల్యే తెలిపారు.

కామారెడ్డి జిల్లాకు, ముఖ్యంగా ఎల్లారెడ్డి ప్రాంతానికి చెందిన రైతు కుటుంబాల పిల్లలు వ్యవసాయ విద్యకు దూరం కాకుండా ఉండేందుకు మాల్తుమ్మెదలోని సీడ్ ఫార్మ్‌లో పూర్తిస్థాయి వసతులతో వ్యవసాయ పాలిటెక్నిక్‌ను తిరిగి ఏర్పాటు చేయాలని కోరినట్లు చెప్పారు.

లేదా ఎల్లారెడ్డిని కేంద్రంగా చేసుకుని కొత్త అగ్రికల్చర్ పాలిటెక్నిక్ ఏర్పాటు చేసే అవకాశాన్ని ప్రభుత్వం పరిశీలించాలని శాసనసభలో విజ్ఞప్తి చేసినట్లు తెలిపారు.

కళాశాలల్లో మౌలిక వసతులు మెరుగుపడాలి

పాత వ్యవసాయ పాలిటెక్నిక్ కళాశాలల్లో కొన్ని వసతులు అందుబాటులో ఉన్నప్పటికీ, కొత్తగా ఏర్పాటు చేసిన కళాశాలల్లో భవనాలు, ల్యాబొరేటరీలు, డెమో ఫార్మ్స్ వంటి మౌలిక వసతులను పూర్తిస్థాయిలో అభివృద్ధి చేయాల్సిన అవసరం ఉందని ఎమ్మెల్యే పేర్కొన్నారు.

ప్రభుత్వం ఇప్పటికే నిధులు మంజూరు చేస్తున్నందున పనులను వేగంగా పూర్తి చేసి విద్యార్థులకు మెరుగైన విద్యా వాతావరణం కల్పించాలని కోరినట్లు తెలిపారు.

నాణ్యమైన విద్య కోసం తనిఖీలు అవసరం

ప్రభుత్వ వ్యవసాయ పాలిటెక్నిక్ కళాశాలలతో పాటు ప్రైవేట్ వ్యవసాయ పాలిటెక్నిక్ కళాశాలల్లోనూ విద్యా ప్రమాణాలను కచ్చితంగా పాటించేలా చర్యలు తీసుకోవాలని ఎమ్మెల్యే కోరారు.

కేవలం పేపర్‌పై తనిఖీలకు పరిమితం కాకుండా ఆకస్మిక తనిఖీలు నిర్వహించాలని, ICAR ప్రమాణాల ప్రకారం అవసరమైన భూమి, సొంత ల్యాబొరేటరీలు, రెగ్యులర్ ఫ్యాకల్టీ వంటి సదుపాయాలు లేని కళాశాలలపై కఠిన చర్యలు తీసుకోవాలని విజ్ఞప్తి చేసినట్లు తెలిపారు.

ఫ్యాకల్టీ ఖాళీలను భర్తీ చేయాలని డిమాండ్

వ్యవసాయ పాలిటెక్నిక్ కళాశాలల్లో ఖాళీగా ఉన్న అసిస్టెంట్ ప్రొఫెసర్ పోస్టులను భర్తీ చేసేందుకు ప్రత్యేక డ్రైవ్ నిర్వహించాలని ఎమ్మెల్యే మదన్ మోహన్ ప్రభుత్వాన్ని కోరారు. రెగ్యులర్ ఫ్యాకల్టీ అందుబాటులో ఉంటేనే విద్యార్థులకు నాణ్యమైన బోధన, ప్రాక్టికల్ శిక్షణ అందుతుందని ఆయన పేర్కొన్నారు.

పాలిటెక్నిక్‌లకు ప్రత్యేక నిధులు కేటాయించాలని విజ్ఞప్తి

రాష్ట్రంలోని పాత, కొత్త ప్రభుత్వ వ్యవసాయ పాలిటెక్నిక్ కళాశాలల్లో మౌలిక వసతుల అభివృద్ధికి ప్రత్యేక నిధులు కేటాయించాలని ఎమ్మెల్యే కోరారు.

ప్రతి కళాశాలలో భవనాలు, Soil Lab, Seed Lab, Farm Machinery Lab వంటి అవసరమైన మౌలిక వసతుల కోసం ప్రత్యేకంగా నిధులు కేటాయించాలని విజ్ఞప్తి చేసినట్లు తెలిపారు.

ప్రైవేట్ కళాశాలలపై పర్యవేక్షణ పెంచాలి

ప్రైవేట్ వ్యవసాయ పాలిటెక్నిక్ కళాశాలల్లో విద్యార్థులకు నాణ్యమైన విద్యతో పాటు అవసరమైన వసతులు అందేలా ప్రభుత్వం మరింత పర్యవేక్షణ చేపట్టాలని ఎమ్మెల్యే అన్నారు.

ప్రతి సంవత్సరం థర్డ్ పార్టీ ఆడిట్, ఫీజుల నియంత్రణ, హాస్టల్, స్కాలర్‌షిప్ సదుపాయాలు వంటి అంశాలను తప్పనిసరిగా పరిశీలించే విధంగా వ్యవస్థను బలోపేతం చేయాలని కోరినట్లు తెలిపారు.

ఎల్లారెడ్డి ప్రాంతానికి వ్యవసాయ విద్యలో మరిన్ని అవకాశాలు కల్పించడమే తన లక్ష్యమని, మాల్తుమ్మెద పాలిటెక్నిక్ పునరుద్ధరణ లేదా ఎల్లారెడ్డిలో కొత్త అగ్రికల్చర్ పాలిటెక్నిక్ ఏర్పాటు అంశాన్ని ప్రభుత్వం సానుకూలంగా పరిశీలిస్తుందని ఆశిస్తున్నట్లు ఎమ్మెల్యే మదన్ మోహన్ తెలిపారు.