కామారెడ్డి జిల్లా, సెప్టెంబర్ 4: పాల్వంచ మండలం ఫరీద్‌పేట గ్రామంలోని 9వ వార్డు ఎస్సీ మహిళా వార్డు సభ్యురాలు దేవోల్లా ప్రత్యూష తనపై గ్రామ సర్పంచ్ జీడిపల్లి నర్సింహ రెడ్డి, ఆయన అనుచరులు కక్షసాధింపు చర్యలకు పాల్పడుతూ వేధిస్తున్నారని ఆరోపించారు. ఈ మేరకు రాష్ట్ర ముఖ్యమంత్రి, పంచాయతీరాజ్ అధికారులు, మంత్రులు, ఎస్సీ, ఎస్టీ కమిషన్ చైర్మన్లు, గ్రామ ప్రజలు, అధికారులకు లేఖ ద్వారా ఫిర్యాదు చేసినట్లు తెలిపారు.

ఫరీద్‌పేట గ్రామంలో ఎస్సీ మహిళా రిజర్వేషన్ కింద వార్డు సభ్యురాలిగా గెలుపొందినప్పటి నుంచి సర్పంచ్ జీడిపల్లి నర్సింహ రెడ్డి, ఉపసర్పంచ్ కోల బాలగౌడ్, ఉపాధ్యాయుడు కొంగల వెంకటి, 2వ వార్డు సభ్యురాలి భర్త కంఠం సిద్ధారాములు వ్యక్తిగత కక్షలతో తనను వేధిస్తున్నారని ప్రత్యూష ఆరోపించారు.

ఎస్సీ కుల ధ్రువీకరణపై ఫిర్యాదు చేశారని ఆరోపణ

గత మార్చి నెలలో తాను ఎస్సీ కులానికి చెందిన వ్యక్తిని కాదంటూ, ఎస్సీ కోటాను రద్దు చేసి వార్డు సభ్యురాలి పదవి నుంచి తొలగించాలని జిల్లా కలెక్టర్ ప్రజావాణిలో కంఠం సిద్ధారాములు ఫిర్యాదు చేశారని ప్రత్యూష పేర్కొన్నారు. ఈ ఫిర్యాదు సర్పంచ్ జీడిపల్లి నర్సింహ రెడ్డి అండదండలతో చేశారని ఆమె ఆరోపించారు.

ఆ సమయంలో పలు గొడవలు, కేసులు, బైండోవర్‌లు జరిగాయని ఆమె తెలిపారు. కలెక్టర్ ఆదేశాల మేరకు అధికారులు తాము ఎస్సీ షెడ్యూల్డ్ కులానికి చెందినవారమని అధికారికంగా ధ్రువీకరించినప్పటికీ తనపై ఫిర్యాదులు కొనసాగుతున్నాయని పేర్కొన్నారు.

సచివాలయంలో కూడా మళ్లీ ఇదే అంశంపై ఫిర్యాదులు చేస్తూ తనను మానసికంగా వేధిస్తున్నారని ప్రత్యూష ఆరోపించారు. మహిళలను వేధిస్తూ, కులం పేరుతో అణగదొక్కాలని చూస్తున్నారని ఆరోపిస్తూ సర్పంచ్ జీడిపల్లి నర్సింహ రెడ్డి, ఉపసర్పంచ్ బాలాగౌడ్, ఉపాధ్యాయుడు కొంగల వెంకట్, కంఠం సిద్ధారాములపై పోలీస్ స్టేషన్‌తో పాటు జాతీయ ఎస్సీ కమిషన్‌కు ఫిర్యాదు చేసినట్లు ఆమె వెల్లడించారు.

తన ఫిర్యాదులపై అధికారులు, ముఖ్యమంత్రి, ఎస్సీ, ఎస్టీ కమిషన్ స్పందించి, తనపై వేధింపులకు పాల్పడుతున్నారని ఆరోపిస్తున్న వారిపై చట్టపరమైన చర్యలు తీసుకుని న్యాయం చేయాలని దేవోల్లా ప్రత్యూష కోరారు.

గమనిక: ఈ కథనంలోని ఆరోపణలు బాధితురాలు చేసిన ఫిర్యాదు ఆధారంగా ఇవ్వబడ్డాయి. సంబంధిత ఆరోపణలపై తుది నిర్ధారణ లేదా అధికారిక నిర్ణయం ఈ కథనంలో పేర్కొనబడలేదు.