పవార్ వార్త, మండల కేంద్రం: రైతుల పంట నష్టాలకు పరిహారం, పాత రుణాల మాఫీ, కొత్త రుణాల మంజూరు, రైతుబంధు అమలు సహా పలు డిమాండ్ల పరిష్కారం కోసం ఈ నెల 26న అన్ని మండల కేంద్రాల్లో నిరసనలు చేపట్టాలని రైతు సంఘాల నాయకులు పిలుపునిచ్చారు. సంయుక్త కిసాన్ మోర్చా (ఎస్‌కేఎం) జాతీయ కమిటీ పిలుపులో భాగంగా ఈ ఆందోళనలు నిర్వహించనున్నట్లు తెలిపారు.

నవంబర్ 18న మండల కేంద్రంలోని సావులం సాయిల్ అన్న కార్యాలయంలో నిర్వహించిన ప్రెస్‌మీట్‌లో అఖిలభారత ఐక్య రైతు సంఘం రాష్ట్ర కమిటీ సభ్యుడు గుమ్ముల గంగాధర్, పుట్టినడిపి నాగన్న, వ్యవసాయ కార్మిక సంఘం రాష్ట్ర కమిటీ సభ్యుడు పార్వతి రాజేశ్వర్ మాట్లాడారు.

రైతుల రుణాలు మాఫీ చేయాలి

తెలంగాణలో కరువు పరిస్థితులు ఏర్పడుతున్నాయని, పంటలు ఎండిపోవడంతో రైతులు నష్టపోతున్నారని నాయకులు ఆందోళన వ్యక్తం చేశారు. ఖరీఫ్ పంటల సాగు కోసం పెట్టుబడులు పెట్టిన రైతులు నష్టాలను ఎదుర్కొంటున్నారని చెప్పారు. బ్యాంకుల నుంచి రైతులు తీసుకున్న అన్ని రకాల పంట రుణాలను పూర్తిగా మాఫీ చేయాలని, రైతులకు కొత్త రుణాలు అందించాలని ప్రభుత్వాన్ని కోరారు.

రైతుబంధు కింద ఎకరాకు రూ.10 వేల చొప్పున పెట్టుబడి సాయం అందించాలని, ప్రతి రైతుకు పంటల బీమా అమలు చేయాలని డిమాండ్ చేశారు. పంట సాగు ప్రారంభానికి ముందే రైతు భరోసా నిధులను రైతుల ఖాతాల్లో జమ చేయాలని కోరారు.

22ఏ జాబితాలో పట్టా భూములపై అభ్యంతరం

సొంత పట్టా భూములను సైతం 22ఏ నిషేధిత భూముల జాబితాలో చేర్చడం వల్ల రైతులు ఇబ్బందులు ఎదుర్కొంటున్నారని నాయకులు ఆరోపించారు. భూముల రిజిస్ట్రేషన్లు నిలిచిపోవడంతో భూములను అమ్ముకోవడానికి, కొనుగోలు చేయడానికి సమస్యలు వస్తున్నాయని పేర్కొన్నారు.

రైతులకు భూములపై హక్కులు కల్పించాల్సిన ప్రభుత్వం, ఇప్పటికే ఉన్న హక్కులను తొలగించే విధంగా వ్యవహరించడం అన్యాయమని విమర్శించారు. పట్టా భూములను నిషేధిత జాబితా నుంచి తొలగించి రైతులకు ఇబ్బందులు లేకుండా చూడాలని కోరారు.

ఉపాధి కూలీలకు రూ.800 వేతనం ఇవ్వాలి

వ్యవసాయ కార్మికులకు ఉపాధి హామీ పనుల్లో రోజుకు రూ.800 వేతనం చెల్లించాలని, పని దినాల సంఖ్య పెంచాలని నాయకులు డిమాండ్ చేశారు. ఇందిరమ్మ ఇళ్లకు మంజూరైన బిల్లులను వెంటనే విడుదల చేయాలని, గతంలో దరఖాస్తు చేసుకున్న అర్హులైన వృద్ధులందరికీ కొత్త పింఛన్లు మంజూరు చేయాలని కోరారు.

వరి పంట సాగు చేయవద్దని ప్రభుత్వం ప్రకటించిన నేపథ్యంలో ఖరీఫ్‌లో పెట్టుబడులు పెట్టిన రైతులు నష్టపోయారని వారు పేర్కొన్నారు. రైతులు, వ్యవసాయ కార్మికులు ఎదుర్కొంటున్న సమస్యలను పరిష్కరించాలని డిమాండ్ చేస్తూ నవంబర్ 26న అన్ని మండల కేంద్రాల్లో నిరసనలు నిర్వహించనున్నట్లు స్పష్టం చేశారు.

ఈ ప్రెస్‌మీట్‌లో బోధన్ డివిజన్ నాయకులు కాశ రవి, శ్రీపతి మల్లేష్, సిద్ధ పోశెట్టి, ఓడ్డెట్టి రాజు, పెద్దులు సుదర్శన్, లక్ష్మణ్, హనుమాన్లు తదితరులు పాల్గొన్నారు.

0 మంది ఇష్టపడ్డారు
షేర్
డౌన్‌లోడ్న్యూస్ పేపర్ క్లిప్పింగ్ • హై క్వాలిటీ

మరిన్ని వార్తలు

వ్యాఖ్యానించండి