ఇల్లందు నియోజకవర్గానికి సంబంధించిన సాగునీటి అంశాలపై ఎమ్మెల్యే కోరం కనకయ్య రాష్ట్ర నీటిపారుదల శాఖ మంత్రి ఉత్తమ్‌కుమార్ రెడ్డితో చర్చించారు. ఢిల్లీ పర్యటన ముగించుకుని హైదరాబాద్‌కు తిరిగి వస్తున్న సందర్భంగా ఢిల్లీ విమానాశ్రయంలో మంత్రి ఉత్తమ్‌కుమార్ రెడ్డిని ఎమ్మెల్యే కలిశారు.

ఈ సందర్భంగా ఇల్లందు నియోజకవర్గంలోని సీతారామ ప్రాజెక్టుతో పాటు బయ్యారం పెద్ద చెరువుకు గోదావరి జలాలను తీసుకురావాలనే అంశాన్ని ఎమ్మెల్యే మంత్రి దృష్టికి తీసుకెళ్లారు. బయ్యారం ప్రాంత రైతులు, ప్రజల దీర్ఘకాలిక సాగునీటి అవసరాలను కూడా ప్రస్తావించినట్లు తెలిపారు.

ఈ అంశాలపై మంత్రి ఉత్తమ్‌కుమార్ రెడ్డి సానుకూలంగా స్పందించినట్లు ఎమ్మెల్యే కనకయ్య పేర్కొన్నారు. “అతి త్వరలో మీకు, మీ నియోజకవర్గ ప్రజలకు గుడ్‌న్యూస్ చెబుతాను” అని మంత్రి హామీ ఇచ్చినట్లు ఆయన తెలిపారు.

ఈ సమావేశంలో ఇల్లందు మార్కెట్ చైర్మన్ రాంబాబు, గంధంపల్లి కొత్తపేట సర్పంచ్ భూక్య ప్రవీణ్ నాయక్ కూడా ఉన్నారు.