ఎడపల్లి పోలీస్ స్టేషన్ పరిధిలోని జామ్లం గ్రామంలో గణేష్ నిమజ్జనం సందర్భంగా బందోబస్తు విధుల్లో ఉన్న పోలీసు సిబ్బంది విధులకు ఆటంకం కలిగించిన ఘటనపై కేసు నమోదు చేసినట్లు ఎడపల్లి పోలీసులు తెలిపారు.

సెప్టెంబర్ 22, 2026న 9వ రోజు గణేష్ నిమజ్జనం సందర్భంగా జమ్లం గ్రామంలో బందోబస్తు విధుల నిమిత్తం ఫిర్యాదుదారు పాల్దే సృజన్‌తో పాటు ఎం. సాయి, ఎస్. రణధీర్‌లను నియమించారు.

సెప్టెంబర్ 23, 2026 తెల్లవారుజామున సుమారు 12:30 గంటల సమయంలో, జమ్లం గ్రామంలోని వివేకానంద ఎక్స్ రోడ్ వద్దకు గణేష్ విగ్రహాలు చేరుకున్న సమయంలో, ఏ గణేష్ విగ్రహాన్ని ముందుగా ఊరేగింపులో తీసుకెళ్లాలనే విషయమై గణేష్ కమిటీ సభ్యులు రవీందర్ గౌడ్, మనోహర్, మనోజ్ తదితరులు పరస్పరం గొడవకు దిగినట్లు ఫిర్యాదులో పేర్కొన్నారు.

దీంతో శాంతిభద్రతలకు విఘాతం కలగకుండా ఉండేందుకు పోలీస్ కానిస్టేబుల్ పాల్దే సృజన్ మరియు ఎస్. రణధీర్‌లు అక్కడికి వెళ్లి గొడవను నివారించేందుకు ప్రయత్నిస్తూ, సంబంధిత వ్యక్తులకు నచ్చజెప్పారు.

అదే సమయంలో ఎం. సాయి తన మొబైల్ ఫోన్‌లో జరిగిన ఘటనను వీడియో రికార్డు చేస్తుండగా, మంగళ్‌పహాడ్ గ్రామానికి చెందిన రవి, ఎం. సాయి వద్ద ఉన్న మొబైల్ ఫోన్‌ను లాక్కున్నట్లు ఫిర్యాదులో పేర్కొన్నారు. అలాగే జమ్లం గ్రామానికి చెందిన రవీందర్ గౌడ్, మనోజ్, మనోహర్ మరియు మరికొందరు వ్యక్తులు విధి నిర్వహణలో ఉన్న పోలీసు సిబ్బందిని అడ్డుకుని వారి విధులకు ఆటంకం కలిగించినట్లు ఫిర్యాదులో తెలిపారు.

ఫిర్యాదు స్వీకరించిన ఎడపల్లి పోలీస్ స్టేషన్ ఎస్‌ఐ ఎం. రమ కేసు నమోదు చేసి దర్యాప్తు ప్రారంభించారు.