వైద్య సేవలు అందించే ఏఎన్ఎం, ఆశా కార్యకర్తలను డేటా ఎంట్రీల పేరిట ఇబ్బంది పెట్టడం తగదని, ఓటీపీ విధానాన్ని తక్షణమే ఎత్తివేయాలని బీఆర్ఎస్ పార్టీ నాయకుడు, మాజీ ఎంపీటీసీ శీలంశెట్టి రమేష్ డిమాండ్ చేశారు.

గ్రామీణ ప్రాంతాల్లో ప్రతి అడుగులోనూ ప్రజలకు అండగా నిలుస్తూ, ప్రాణాలను కాపాడే పవిత్రమైన వైద్య వృత్తిలో ఉన్నవారు ఏఎన్ఎంలు, ఆశా కార్యకర్తలని ఆయన పేర్కొన్నారు. వైద్యం అందించడమే తమ ప్రథమ కర్తవ్యంగా భావించే వీరిని, నేడు ప్రభుత్వాలు మోస్తున్న అనవసరమైన డేటా ఎంట్రీల భారం తీవ్రంగా కుంగదీస్తోందని ఆయన ఆవేదన వ్యక్తం చేశారు.

రోగులకు సేవలందించాల్సిన చేతులతో యాప్‌లు తిప్పుతూ, సర్వేలంటూ కార్యాలయాల చుట్టూ తిరగాల్సి వస్తోందని, వైద్యం పక్కన పెట్టి కేవలం డేటా ఎంట్రీ మోయాల్సి రావడం వారి వృత్తిని అవమానించడమే అవుతుందని ఆయన అన్నారు.

కుష్టు సర్వే వంటి కార్యక్రమాలలో ప్రతి ఒక్కరి ఓటీపీ అడగాలని ప్రభుత్వం పెట్టిన నిబంధన క్షేత్రస్థాయిలో పెను ముప్పుగా మారిందని ఆయన పేర్కొన్నారు. సైబర్ మోసాలు పెరిగిన ఈ రోజుల్లో, ఓటీపీల కోసం వస్తున్న ఏఎన్ఎంలను చూసి గ్రామస్తులు భయంతో తలుపులు వేసుకునే దుస్థితి ఏర్పడిందని, ప్రజలకు రక్షణగా ఉండాల్సిన వైద్య సిబ్బందిపైనే అనుమానాలు పడేలా చేయడం అత్యంత బాధాకరమని ఆయన అన్నారు.

సమాజంలో అంకితభావానికి ప్రతీకగా నిలిచే ఈ మహిళా ఆరోగ్య సిబ్బందికి తగిన గౌరవం దక్కాలని, వారిని కేవలం క్లర్కులుగా, డేటా ఆపరేటర్లుగా చూడటం మాని, వారి అసలైన వైద్య సేవలకే పరిమితం చేయాలని ఆయన కోరారు.

వైద్య సిబ్బంది ఆత్మగౌరవాన్ని మంటగలుపుతున్న ఈ ఓటీపీ సర్వే విధానాన్ని ప్రభుత్వం వెంటనే రద్దు చేయాలని, ఏఎన్ఎంలు, ఆశా కార్యకర్తలపై బలవంతపు డేటా ఎంట్రీల భారాన్ని తొలగించి, వారు ఎలాంటి భయాలు లేకుండా ప్రశాంతంగా తమ ప్రాథమిక వైద్య సేవలను అందించేలా తక్షణ చర్యలు తీసుకోవాలని శీలంశెట్టి రమేష్ ప్రభుత్వాన్ని డిమాండ్ చేశారు.