మళ్లీ మీరే ఎమ్మెల్యే కావాలి.. గణనాథుడిని వేడుకున్న బీఆర్ఎస్ నాయకుడు చర్ల దేవదాస్

ఎల్లారెడ్డి మున్సిపల్ పరిధిలోని గండి మాసంపేట్ గ్రామంలో నిర్వహించిన వినాయక లడ్డూ వేలంలో బీఆర్ఎస్ నాయకుడు, ఎల్లారెడ్డి సొసైటీ డైరెక్టర్ చర్ల దేవదాస్ రూ.56,100కు లడ్డూను దక్కించుకున్నారు. ఈ సందర్భంగా మాజీ ఎమ్మెల్యే జాజాల సురేందర్ మళ్లీ ఎమ్మెల్యేగా గెలవాలని గణనాథుడిని ప్రార్థిస్తూ ఆయన తన అభిమానాన్ని చాటుకున్నారు.

వినాయక చవితి సందర్భంగా గ్రామంలో ఏర్పాటు చేసిన వినాయక మండపం వద్ద గురువారం రాత్రి లడ్డూ వేలం నిర్వహించారు. ఈ వేలంలో పాల్గొన్న చర్ల దేవదాస్ రూ.56,100కు వినాయక లడ్డూను సొంతం చేసుకున్నారు.

జాజాల సురేందర్ మళ్లీ ఎమ్మెల్యే కావాలని ప్రార్థన

లడ్డూ వేలం అనంతరం మండపం పూజారి తన మనసులోని కోరికను గణనాథుడికి తెలియజేయాలని దేవదాస్‌ను కోరారు. దీంతో రానున్న అసెంబ్లీ ఎన్నికల్లో ఎల్లారెడ్డి నియోజకవర్గ మాజీ ఎమ్మెల్యే జాజాల సురేందర్ ప్రజల ఆశీర్వాదంతో మళ్లీ విజయం సాధించి, నియోజకవర్గ ప్రజలకు సేవ చేసే అవకాశం పొందాలని ఆయన ప్రార్థించారు.

మాజీ ఎమ్మెల్యేకు వినాయక లడ్డూ అందజేత

గ్రామంలో నిర్వహించిన లడ్డూ వేలంలో రూ.56,100కు వినాయకుడి లడ్డూను దక్కించుకోవడం ఆనందంగా ఉందని దేవదాస్ తెలిపారు.

శుక్రవారం మాజీ ఎమ్మెల్యే జాజాల సురేందర్ నివాసానికి వెళ్లిన ఆయన, వినాయకుడి ప్రసాదమైన లడ్డూను అందజేసి తన సంతోషాన్ని పంచుకున్నారు.

ఈ కార్యక్రమంలో ఎల్లారెడ్డి పట్టణ మాజీ అధ్యక్షుడు ఆదిమూలం సతీష్ కుమార్, ఎల్లారెడ్డి సొసైటీ అధ్యక్షుడు ఏగుల నర్సింలు, కాశయ్య, పరమేష్ తదితరులు పాల్గొన్నారు.