భవన నిర్మాణ కార్మికుల సమస్యలు పరిష్కరించాలి

ఎల్లారెడ్డి, ఆగస్టు 12, తెలంగాణ పవార్ దినపత్రిక:
భవన నిర్మాణ కార్మికుల హక్కులు, సంక్షేమం కోసం ప్రభుత్వం మరిన్ని చర్యలు
చేపట్టాలని కార్మిక నాయకులు డిమాండ్ చేశారు. ఎల్లారెడ్డి మున్సిపల్ భవన
నిర్మాణ కార్మికుల ప్రాంగణం, సొసైటీ సమీపంలోని బీడీ కాలనీలో బుధవారం
నిర్వహించిన సంఘ చర్చా సమావేశంలో ఎల్లారెడ్డి మండలానికి చెందిన భవన
నిర్మాణ కార్మికులు పాల్గొన్నారు.

ఈ సందర్భంగా కార్మిక నాయకులు మాట్లాడుతూ.. కార్మికుల హక్కుల కోసం అనేక మంది
శ్రమజీవులు చేసిన పోరాటాల ఫలితంగా భవన నిర్మాణ కార్మికులకు సంక్షేమ పథకాలు
అమలులోకి వచ్చాయని తెలిపారు. కార్మికులు తమ హక్కులు, కార్మిక చట్టాలపై
అవగాహన కలిగి ఉండాలని సూచించారు. ప్రతి భవన నిర్మాణ కార్మికుడికి లేబర్
కార్డు ఉండేలా అధికారులు చర్యలు తీసుకోవాలని కోరారు.

రూ.5 వేల పింఛన్‌ ఇవ్వాలి

భవన నిర్మాణ కార్మికులకు 50 సంవత్సరాల వయస్సు నిండిన తర్వాత వెల్ఫేర్
బోర్డు ద్వారా నెలకు రూ.5 వేల పింఛన్‌ అందించాలని
కార్మిక నాయకులు డిమాండ్ చేశారు. 60 సంవత్సరాల వయస్సు వచ్చిన తర్వాత
లేబర్‌ కార్డు రద్దు కాకుండా జీవితకాలం కొనసాగించేలా ప్రభుత్వం
నిబంధనలు రూపొందించాలని కోరారు.

ప్రభుత్వ భవనాలపై మేస్త్రీల పేర్లు నమోదు చేయాలి

ప్రభుత్వ భవనాల నిర్మాణ సమయంలో శిలాఫలకాలపై కష్టపడి పనిచేసే మేస్త్రీల
పేర్లను కూడా నమోదు చేయాలని కార్మిక నాయకులు సూచించారు. భవన నిర్మాణ
పనుల్లో సిమెంట్‌ దుమ్ము, ధూళి కారణంగా కార్మికులు చిన్న వయస్సులోనే
అనారోగ్య సమస్యలకు గురవుతున్నారని ఆవేదన వ్యక్తం చేశారు.

నిర్మాణ రంగ కార్మికుల ఆరోగ్య పరిరక్షణకు ప్రభుత్వం ప్రత్యేక చర్యలు
తీసుకోవాలని, కార్మికులకు ఈఎస్ఐ ఆసుపత్రి కార్డు సౌకర్యం
కల్పించాలని ప్రభుత్వాన్ని కోరారు.

నకిలీ లేబర్‌ కార్డులపై చర్యలు తీసుకోవాలి

బాన్సువాడ సహాయ కార్మిక అధికారి పరిధిలో నిజంగా భవన నిర్మాణ పనులు చేస్తున్న
కార్మికులను పక్కన పెట్టి, నకిలీ లేబర్‌ కార్డులు, తప్పుడు ప్రయోజనాలు
ఇప్పిస్తున్న మధ్యవర్తులపై కార్మిక శాఖ అధికారులు చట్టపరమైన చర్యలు
తీసుకోవాలని నాయకులు డిమాండ్ చేశారు.

కార్మిక సంక్షేమంపై తీర్మానం

కార్మికుల సంక్షేమం కోసం ప్రభుత్వం మరిన్ని పథకాలు అమలు చేయడంతో పాటు,
ప్రస్తుతం అమలులో ఉన్న పథకాల ప్రయోజనాలు అర్హులైన ప్రతి కార్మికుడికి
అందేలా చర్యలు తీసుకోవాలని సమావేశంలో తీర్మానించారు.

కార్మిక సంఘం నాయకులు పాల్గొన్నారు

ఈ కార్యక్రమంలో భవన నిర్మాణ కార్మిక సంఘం
వ్యవస్థాపక అధ్యక్షుడు మహామేస్త్రీ మర్లు సాయిబాబు,
మండల ఉపాధ్యక్షుడు పెద్దబాలి సాయిలు,
మండల కోశాధికారి దుర్గా సింగ్ లక్ష్మణ్,
మండల ప్రధాన కార్యదర్శి కరీం, మండల సలహాదారులు
పోచయ్య, రామ్మోహన్, శివాజీ, ఏ.బాబు, చందర్, శ్యామ్, సత్యనారాయణ,
పోలెపు ప్రతాప్ రాజు, కార్యవర్గ సభ్యులు మానయ్య, తిరుపతి, జయరాములు,
రఫిక్, బాల జానీ, సైదుల్, బాలయ్య, భాగయ్య, శ్రీను, రవి తదితరులు
పాల్గొన్నారు.