హైదరాబాద్ డిక్లరేషన్‌కు ఫెడరేషన్ ఆఫ్ ప్రెస్ క్లబ్స్ ఆమోదం

దేశవ్యాప్తంగా పత్రికా స్వేచ్ఛను బలోపేతం చేయడం, మీడియా స్వేచ్ఛను పరిరక్షించడం, జర్నలిస్టుల హక్కులకు రక్షణ కల్పించడం లక్ష్యంగా రూపొందించిన హైదరాబాద్ డిక్లరేషన్‌ను ఫెడరేషన్ ఆఫ్ ప్రెస్ క్లబ్స్ ఆమోదించింది.

ఆదివారం హైదరాబాద్‌లో జరిగిన మీడియా కాన్‌క్లేవ్‌లో ఈ డిక్లరేషన్‌ను ఆమోదించినట్లు ఫెడరేషన్ ప్రకటించింది.

దేశంలోని వివిధ ప్రెస్ క్లబ్‌లతో సమన్వయం చేసుకుని జర్నలిజం అభివృద్ధికి కార్యక్రమాలు చేపట్టాలని నిర్ణయించింది. సామూహిక చర్యలకు ఉమ్మడి వేదికను ఏర్పాటు చేయడంతో పాటు, రాజ్యాంగంలోని ఆర్టికల్ 19(1)(a) ద్వారా హామీ ఇచ్చిన పత్రికా స్వేచ్ఛను బలోపేతం చేయాలని పేర్కొంది.

డిక్లరేషన్‌లోని ముఖ్యాంశాలు

• జర్నలిస్టులు, మీడియా సిబ్బంది ఎదుర్కొంటున్న భద్రత, మానసిక ఆరోగ్యం, ఉద్యోగ సంబంధిత సమస్యలకు అత్యంత ప్రాధాన్యత.
• వైద్య అత్యవసర పరిస్థితులు, ఆర్థిక ఇబ్బందుల్లో ఉన్న జర్నలిస్టులు, ఫొటో జర్నలిస్టులకు సకాలంలో సహాయం.
• వృత్తిపరమైన విధులు నిర్వహిస్తున్న సమయంలో వేధింపులు ఎదుర్కొంటున్న జర్నలిస్టులకు న్యాయ సహాయం.
• పత్రికా స్వేచ్ఛకు విఘాతం కలిగించే చట్టాలను వ్యతిరేకిస్తూ న్యాయపరమైన జోక్యం.
• వనరులు లేని అంశాలపై పనిచేస్తున్న జర్నలిస్టులకు రిపోర్టింగ్ ఫెలోషిప్‌లు.
• మీడియా పరిస్థితి, జర్నలిస్టుల సమస్యలపై నివేదికలు, పరిశోధనలు, ఆడియో-విజువల్ కంటెంట్ రూపకల్పన.
• రాష్ట్ర స్థాయి ప్రెస్ క్లబ్‌ల మధ్య నెట్‌వర్కింగ్, వనరుల భాగస్వామ్యం పెంపు.
• శిక్షణా కార్యక్రమాలు, సెమినార్లు, వర్క్‌షాప్‌ల నిర్వహణ.
• విద్యార్థుల్లో మీడియా అవగాహన కోసం మీడియా లిటరసీ కోర్సుల సిలబస్ రూపకల్పన.
• నైతిక జర్నలిజం, వృత్తిపరమైన ప్రమాణాల ప్రోత్సాహం.
• జర్నలిస్టుల సంక్షేమం కోసం పెన్షన్, బీమా, సామాజిక భద్రతా చర్యలు, ఆరోగ్య కార్యక్రమాలు.

జాతీయ, అంతర్జాతీయ సంస్థలతో కలిసి పత్రికా స్వేచ్ఛ, జర్నలిస్టుల హక్కుల కోసం పనిచేయాలని ఫెడరేషన్ నిర్ణయించింది.