కామారెడ్డి జిల్లా బిబిపేట మండలంలో రోడ్ల పరిస్థితి దారుణంగా ఉందని తాజా మాజీ ఎంపీటీసీ కొరవి నరసింహులు ముదిరాజ్ తెలిపారు. మండలంలోని పలు ప్రాంతాల్లో రోడ్లు గుంతలమయంగా మారడంతో ప్రజలు, వాహనదారులు తీవ్ర ఇబ్బందులు ఎదుర్కొంటున్నారని పేర్కొన్నారు.

ముఖ్యంగా బిబిపేట నుంచి ఉప్పరపల్లి మధ్యలో ఉన్న రహదారి ప్రమాదకరంగా మారిందని, రోడ్డుపై ఏర్పడిన గుంతల కారణంగా ఎప్పుడు ఏ ప్రమాదం జరుగుతుందో తెలియని పరిస్థితి నెలకొందని అన్నారు.

ప్రస్తుతం వర్షాకాలం కావడంతో గుంతల్లో నీరు నిలిచిపోతుందని, దీంతో గుంతల లోతు తెలియక వాహనదారులు ప్రమాదాలకు గురయ్యే అవకాశం ఉందని ఆందోళన వ్యక్తం చేశారు. సంబంధిత అధికారులు వెంటనే స్పందించి నాణ్యమైన బీటీ రోడ్డు నిర్మాణానికి చర్యలు చేపట్టాలని కోరారు.

చెరువు కట్ట కింది నుంచి ఉప్పరపల్లి మీదుగా రామంపేట వరకు వెళ్లే మార్గంలో కూడా రోడ్డు పరిస్థితిని పరిశీలించి అవసరమైన చోట బీటీ రోడ్డు నిర్మించాలని డిమాండ్ చేశారు.

ప్రమాదం జరిగిన తర్వాత చర్యలు తీసుకోవడం కంటే ప్రమాదం జరగకముందే అధికారులు స్పందించి ప్రజల భద్రతకు ప్రాధాన్యత ఇవ్వాలని అన్నారు.

అభివృద్ధి విషయంలో పార్టీలకు అతీతంగా అందరూ కలిసి పనిచేయాలని, రాజకీయ పార్టీలు తమ జెండాలను పక్కన పెట్టి ప్రజా సమస్యల పరిష్కారానికి ఏకతాటిపైకి రావాలని కొరవి నరసింహులు పిలుపునిచ్చారు.

బిబిపేట గ్రామంతో పాటు మండల పరిధిలోని అన్ని గ్రామాలు అభివృద్ధి చెందాలని, ప్రజలకు ఎలాంటి అపాయం కలగకుండా ముందస్తు చర్యలు తీసుకోవాలనే ఉద్దేశంతో ఈ ప్రెస్‌మీట్ నిర్వహించినట్లు తెలిపారు.