విద్యార్థులకు మెరుగైన విద్యా సౌకర్యాలు, అవసరమైన మౌలిక వసతులు కల్పించడమే ప్రభుత్వ లక్ష్యమని ప్రభుత్వ సలహాదారు మహమ్మద్ అలీ షబ్బీర్ తెలిపారు. కామారెడ్డి పట్టణంలోని ప్రభుత్వ జూనియర్ కళాశాలలో శుక్రవారం విద్యార్థులకు నోట్‌బుక్స్, కాలేజ్ బ్యాగులు, స్పోర్ట్స్ షూస్ పంపిణీ చేశారు.

ఈ సందర్భంగా విద్యార్థులతో మాట్లాడిన షబ్బీర్ అలీ.. వారి విద్యాభ్యాసం, కళాశాలలో అందుతున్న సౌకర్యాల గురించి తెలుసుకున్నారు.

1,100 మంది విద్యార్థులకు అడ్మిషన్లు

కామారెడ్డి ప్రభుత్వ జూనియర్ కళాశాలలో 1,100 మంది విద్యార్థులకు అడ్మిషన్లు కల్పించి జిల్లాలోనే ప్రథమ స్థానంలో నిలవడం అభినందనీయమని షబ్బీర్ అలీ అన్నారు. విద్యార్థుల సంఖ్యకు అనుగుణంగా కళాశాలలో మౌలిక వసతులను మరింత అభివృద్ధి చేయాల్సిన అవసరం ఉందని పేర్కొన్నారు.

కొత్త తరగతి గదులకు నిధులు

కళాశాల అభివృద్ధి కోసం కొత్త తరగతి గదుల నిర్మాణానికి అవసరమైన నిధులు మంజూరు చేస్తామని షబ్బీర్ అలీ తెలిపారు.

విద్యార్థులు, అధ్యాపకులు ఎదుర్కొంటున్న సమస్యలను దృష్టిలో ఉంచుకుని కళాశాల నుంచి ఆర్‌అండ్‌బీ ప్రధాన రహదారి వరకు సీసీ రోడ్డు నిర్మాణాన్ని అత్యవసరంగా చేపట్టాలని అధికారులను ఆదేశించినట్లు తెలిపారు. పది రోజుల్లోగా సీసీ రోడ్డు పనులను పూర్తి చేయాలని స్పష్టం చేశారు.

విద్యార్థుల సంక్షేమానికి ప్రాధాన్యత

ప్రభుత్వం విద్యార్థుల సంక్షేమానికి పెద్దపీట వేస్తోందని షబ్బీర్ అలీ పేర్కొన్నారు. ప్రభుత్వ హాస్టళ్లలో ఉంటున్న విద్యార్థులకు అందించే కాస్మోటిక్ చార్జీలను 200 శాతం పెంచినట్లు తెలిపారు.

ప్రభుత్వ పాఠశాలలు, విద్యాసంస్థల్లో చదువుతున్న విద్యార్థులకు యూనిఫామ్స్, షూస్, స్టడీ మెటీరియల్, పాఠ్యపుస్తకాలు, నోట్‌బుక్స్ వంటి అవసరాలను ప్రభుత్వం ఉచితంగా అందిస్తోందని చెప్పారు. విద్యార్థులు ఈ అవకాశాలను సద్వినియోగం చేసుకుని ఉన్నత లక్ష్యాలను సాధించాలని సూచించారు.

విద్యారంగంలో పలు చర్యలు చేపడుతున్నామని వెల్లడి

ముఖ్యమంత్రి రేవంత్ రెడ్డి విద్యాశాఖపై ప్రత్యేక దృష్టి సారించి విద్యారంగాన్ని మరింత బలోపేతం చేస్తున్నారని షబ్బీర్ అలీ అన్నారు. విద్యాశాఖను ముఖ్యమంత్రి తన వద్దే ఉంచుకుని పలు కీలక నిర్ణయాలు తీసుకుంటున్నారని తెలిపారు.

ప్రతి నియోజకవర్గానికి రూ.200 కోట్ల వ్యయంతో ఇంటిగ్రేటెడ్ రెసిడెన్షియల్ స్కూల్ నిర్మాణం చేపడుతున్నామని చెప్పారు. విద్యార్థుల్లో క్రీడా ప్రతిభను వెలికితీసేందుకు స్పోర్ట్స్ యూనివర్సిటీ ఏర్పాటు, ఆధునిక సాంకేతిక పరిజ్ఞానంతో కూడిన ఐటీఐ సెంటర్ల అభివృద్ధి వంటి చర్యలు చేపడుతున్నట్లు తెలిపారు.

విద్యార్థులకు నాణ్యమైన విద్యతో పాటు అవసరమైన మౌలిక వసతులు, క్రీడా సౌకర్యాలు అందుబాటులోకి తీసుకురావడానికి ప్రభుత్వం కృషి చేస్తోందని షబ్బీర్ అలీ పేర్కొన్నారు.

కార్యక్రమంలో పాల్గొన్నవారు

ఈ కార్యక్రమంలో మున్సిపల్ చైర్మన్ ఇప్ప ఉమారాణి శ్రీనివాస్, మాజీ డీసీసీ అధ్యక్షులు కైలాస్ శ్రీనివాస్, స్థానిక కౌన్సిలర్లు ప్రియాంక సంతోష్, వనిత రామ్మోహన్, అంజాద్, వాజీద్, మజీద్, సిద్ధిఖీ, గణేష్, చిట్టిబాబు, భూపతి, సత్యం, సొసైటీ చైర్మన్ గూడెం శ్రీనివాస్ రెడ్డి, పండ్ల రాజు, అశోక్ రెడ్డి, మోహన్ రెడ్డి, వైద్య కిషన్, నౌసిలాల్, గణేష్ నాయక్, ఎస్సీ సెల్ జిల్లా అధ్యక్షులు బాలరాజు, మాజీ గ్రంథాలయ చైర్మన్ పున్నమి రాజేశ్వర్, వార్డు ప్రజలు, మహిళలు, కాంగ్రెస్ నాయకులు, కార్యకర్తలు తదితరులు పాల్గొన్నారు.