సుప్రీంకోర్టులో తెలంగాణ ప్రభుత్వానికి ఎదురుదెబ్బ.. శాంతా శ్రీరామ్ భూమిపై పిటిషన్ డిస్మిస్

హైదరాబాద్‌: మల్కాజిగిరి పరిధిలోని లోతుకుంటలో 40 ఎకరాల భూమికి సంబంధించిన వివాదంలో తెలంగాణ ప్రభుత్వానికి సుప్రీంకోర్టులో ఎదురుదెబ్బ తగిలింది. శాంతా శ్రీరామ్ కన్‌స్ట్రక్షన్స్‌కు సంబంధించిన భూమి వివాదంపై ప్రభుత్వం దాఖలు చేసిన పిటిషన్‌ను సుప్రీంకోర్టు డిస్మిస్ చేసింది.

లోతుకుంట గ్రామంలోని సర్వే నంబర్లు 1, 2లో ఉన్న 40 ఎకరాల భూమిపై తెలంగాణ ప్రభుత్వం, శాంతా శ్రీరామ్ కన్‌స్ట్రక్షన్స్ మధ్య కొంతకాలంగా వివాదం కొనసాగుతోంది. ఈ భూమి ప్రభుత్వానికి చెందినదని ప్రభుత్వం వాదించగా.. సంస్థ మాత్రం తమకు హక్కులు ఉన్నాయని పేర్కొంటూ న్యాయపోరాటం చేసింది.

ఈ వివాదంపై గతంలో తెలంగాణ హైకోర్టు శాంతా శ్రీరామ్ కన్‌స్ట్రక్షన్స్‌కు అనుకూలంగా తీర్పు ఇచ్చింది. ఆ తీర్పును సవాల్ చేస్తూ తెలంగాణ ప్రభుత్వం సుప్రీంకోర్టును ఆశ్రయించింది.

తాజాగా సుప్రీంకోర్టు తెలంగాణ ప్రభుత్వం దాఖలు చేసిన పిటిషన్‌ను కొట్టివేసింది. దీంతో లోతుకుంటలోని 40 ఎకరాల భూమికి సంబంధించి శాంతా శ్రీరామ్ కన్‌స్ట్రక్షన్స్‌కు అనుకూలంగా ఉన్న హైకోర్టు తీర్పుకు మద్దతు లభించినట్లైంది.

గతంలో హైడ్రాపై హైకోర్టు ఆగ్రహం

ఇదే భూమి వివాదంలో హైడ్రా జోక్యంపై తెలంగాణ హైకోర్టు గతంలో తీవ్రంగా స్పందించింది. కోర్టు ఆదేశాలను ఉల్లంఘిస్తూ వివాదాస్పద భూమిలోకి ప్రవేశించారన్న ఆరోపణల నేపథ్యంలో హైడ్రా కమిషనర్ ఏ.వి. రంగనాథ్‌పై ధిక్కరణ వ్యవహారం కూడా విచారణకు వచ్చింది.

హైకోర్టు గతంలో రంగనాథ్‌ను హైడ్రా కమిషనర్ పదవి నుంచి తప్పించి, ఆయన స్థానంలో మరో అధికారిని నియమించాలని ప్రభుత్వ ప్రధాన కార్యదర్శిని ఆదేశించింది.

తాజా సుప్రీంకోర్టు తీర్పుతో లోతుకుంట 40 ఎకరాల భూమి వివాదం మరోసారి చర్చనీయాంశంగా మారింది.