బీబీపేట్‌లో పగిలిన మిషన్ భగీరథ పైప్‌లైన్.. రోడ్డుపైకి తాగునీరు

కామారెడ్డి జిల్లా బీబీపేట్: మండల కేంద్రం నుంచి తుజల్పూర్ వెళ్లే ఆర్‌అండ్‌బీ రోడ్డుపై మిషన్ భగీరథ పైప్‌లైన్ పగిలి తాగునీరు రోడ్డుపైకి వస్తోంది. దీంతో రహదారిపై ప్రయాణించే వాహనాల కారణంగా నీరు కలుషితమయ్యే అవకాశం ఉందని స్థానికులు ఆందోళన వ్యక్తం చేస్తున్నారు.

ఈ సమస్యను బీబీపేట్ తాజా మాజీ ఎంపీటీసీ కొరివి నీరజ భర్త కొరివి నరసింహులు మంగళవారం ఉదయం 8:30 గంటల సమయంలో పరిశీలించారు. ఈ సందర్భంగా కాలనీ వాసులతో మాట్లాడి సమస్య తీవ్రత, ఇప్పటివరకు అధికారుల స్పందనపై వివరాలు అడిగి తెలుసుకున్నారు.

రోడ్డుపై వాహనాల రాకపోకల కారణంగా పైప్‌లైన్ నుంచి వస్తున్న తాగునీటిలో మురికి, క్రిమికీటకాలు కలిసే అవకాశం ఉందని నరసింహులు పేర్కొన్నారు. దీనివల్ల ప్రజల ఆరోగ్యానికి ఇబ్బందులు తలెత్తే అవకాశం ఉందని తెలిపారు.

గ్రామపంచాయతీ సిబ్బంది, ఆర్‌అండ్‌బీ అధికారులు సమస్యపై వెంటనే స్పందించి పగిలిన పైప్‌లైన్‌కు మరమ్మతులు చేపట్టాలని కొరివి నరసింహులు డిమాండ్ చేశారు. సమస్యను పరిష్కరించకపోతే తాగునీరు కలుషితం కావడం వల్ల ఏదైనా ఇబ్బంది తలెత్తితే గ్రామపంచాయతీ, సంబంధిత ప్రభుత్వ అధికారులదే బాధ్యత అని ఆయన పేర్కొన్నారు.