గణేష్ నిమజ్జనం సందర్భంగా బీఆర్ఎస్ పార్టీ నాయకులు, కార్యకర్తలకు సూచనలు చేస్తున్నట్లుగా ఒక సందేశం సోషల్ మీడియాలో ప్రచారంలో ఉంది. ఈ సందేశంపై కామారెడ్డి జిల్లా డీసీసీ అధ్యక్షులు ఏలే మల్లికార్జున్ స్పందించారు.

సోషల్ మీడియాలో ప్రచారంలో ఉన్న సందేశం: గణేష్ నిమజ్జనం సందర్భంగా ట్యాంక్ బండ్ వద్ద, ముఖ్యంగా సచివాలయం ముందు వినాయకుడి ఊరేగింపులో కేసీఆర్ పాటలను పెట్టి డాన్స్ చేయాలని, ఆ వీడియోలను డిజిటల్ వింగ్‌కు పంపించాలని సూచించినట్లు ఆ సందేశంలో పేర్కొన్నారు.

ఆ వీడియోలను సోషల్ మీడియాలో వైరల్ చేస్తామని, గతంలో కంటే ఒక్కో వీడియోకు రూ.500 అదనంగా ఇస్తామని సందేశంలో పేర్కొన్నట్లు ప్రచారం జరుగుతోంది. 30 సెకన్ల వీడియోకు రూ.1,000, ఒక నిమిషం వీడియోకు రూ.2,000 చెల్లింపుతో పాటు ప్రతి బృందానికి కేసు బీర్లు లేదా రెండు ఫుల్ బాటిళ్లు, ప్రతి ఒక్కరికీ బిర్యానీ ప్యాకెట్ అందిస్తామని కూడా అందులో పేర్కొన్నట్లు సమాచారం.

ఈ సందేశం చివరలో “సంధ్యా రాజేశ్వర్ రావు, BRS పార్టీ కార్యదర్శి హైదరాబాద్” అని పేర్కొని ఉంది.

అయితే, ఈ సందేశం నిజమైతే గణేష్ నిమజ్జనం వంటి భక్తి కార్యక్రమాన్ని రాజకీయ ప్రచారానికి ఉపయోగించాలనే అంశంపై ఆలోచించాల్సిన అవసరం ఉందని కామారెడ్డి జిల్లా డీసీసీ అధ్యక్షులు ఏలే మల్లికార్జున్ అన్నారు.

రాజకీయాలకు ఇతర వేదికలు ఉన్నాయని, వినాయకుడి నిమజ్జనాన్ని మాత్రం రాజకీయ ప్రచారానికి వేదికగా మార్చవద్దని ఏలే మల్లికార్జున్ కోరారు.