వినాయక చవితి సందర్భంగా కామారెడ్డి నియోజకవర్గ పరిధిలోని వినాయక మండపాలకు లడ్డూ ప్రసాదం అందజేసే కార్యక్రమానికి శ్రీకారం చుట్టారు. ప్రతి ఏడాది నిర్వహిస్తున్న సంప్రదాయంలో భాగంగా పట్టణంలోని 25వ వార్డులో లడ్డూ ప్రసాదం తయారీ పూజా కార్యక్రమాన్ని బీజేపీ నాయకులు నిర్వహించారు.

ఈ సందర్భంగా బీజేపీ నాయకులు మాట్లాడుతూ.. కామారెడ్డి శాసనసభ్యులు కాటిపల్లి వెంకట రమణారెడ్డి ఆధ్వర్యంలో గత తొమ్మిదేళ్లుగా నియోజకవర్గ పరిధిలోని వినాయక మండపాలకు లడ్డూ ప్రసాదం అందజేస్తున్నామని తెలిపారు. ఈ ఏడాది కూడా అదే సంప్రదాయాన్ని కొనసాగిస్తూ మండపాలకు లడ్డూ ప్రసాదం అందజేయనున్నట్లు పేర్కొన్నారు.

ప్రశాంత వాతావరణంలో వేడుకలు నిర్వహించాలి

వినాయక చవితి పండుగను యువత, పెద్దలు, చిన్నారులు భక్తిశ్రద్ధలతో, ప్రశాంత వాతావరణంలో నిర్వహించుకోవాలని బీజేపీ నాయకులు సూచించారు. గణేష్ నవరాత్రుల నుంచి నిమజ్జనం వరకు ఎలాంటి అవాంఛనీయ ఘటనలు చోటుచేసుకోకుండా నిర్వాహకులు, భక్తులు పరస్పరం సహకరించాలని కోరారు.

సమస్యలు ఉంటే సంప్రదించాలి

వినాయక మండపాల నిర్వాహకులకు ఏవైనా సమస్యలు ఎదురైతే స్థానిక బీజేపీ నాయకులను సంప్రదించాలని వారు సూచించారు. సమస్యలను సంబంధిత అధికారుల దృష్టికి తీసుకెళ్లి పరిష్కరించేందుకు తమ వంతు కృషి చేస్తామని తెలిపారు.

ఈ కార్యక్రమంలో బీజేపీ నాయకులు, కార్యకర్తలు, గణేష్ మండపాల నిర్వాహకులు తదితరులు పాల్గొన్నారు.