కామారెడ్డి జిల్లా రైస్ మిల్లర్లు ఎదుర్కొంటున్న సమస్యలను పరిష్కరించాలని కోరుతూ కామారెడ్డి జిల్లా రైస్ మిల్లర్స్ అసోసియేషన్ ప్రభుత్వానికి, సంబంధిత అధికారులకు వినతిపత్రం సమర్పించింది. ముఖ్యంగా కస్టమ్ మిల్లింగ్ రైస్ (CMR) ప్రక్రియలో ఎదురవుతున్న ఇబ్బందులు, షార్టేజీ, నాన్-ఎఫ్‌ఏక్యూ ధాన్యం, డ్రైయింగ్ లాస్, ఓపెన్ స్టాక్, భౌతిక తనిఖీలు, పెండింగ్ బకాయిలు, ఫైన్లకు సంబంధించిన అంశాలను పరిష్కరించాలని సంఘం కోరింది.

సంఘం వివరాల ప్రకారం.. ప్రభుత్వం నుంచి రావాల్సిన బకాయిలు, CMR ప్రక్రియలోని సమస్యలు, ధాన్యం నాణ్యతకు సంబంధించిన అంశాల కారణంగా మిల్లర్లు ఆర్థిక ఇబ్బందులు ఎదుర్కొంటున్నారని పేర్కొంది.

15–20 శాతం షార్టేజీపై ఒత్తిడి చేయొద్దని విజ్ఞప్తి

ప్రస్తుతం నిల్లరపై 15 శాతం నుంచి 20 శాతం వరకు షార్ట్ఫాల్ విధించే నిబంధనల్లో మిల్లర్లు ఇబ్బందులు ఎదుర్కొంటున్నారని అసోసియేషన్ తెలిపింది. కార్పొరేషన్ కాజ్ షీట్ ప్రకారం పెండింగ్ డబ్బులు చెల్లించాలని మిల్లర్లపై ఒత్తిడి చేయకుండా చూడాలని కోరింది. గతంలో ప్రభుత్వం నిర్దేశించిన గడువులోపు CMR డెలివరీలను పూర్తి చేసేందుకు మిల్లర్లకు తగిన అవకాశం కల్పించాలని విజ్ఞప్తి చేసింది.

రబీ 2025–26 బాయిల్డ్ ధాన్యం సమస్య పరిష్కరించాలి

రబీ 2025–26 సీజన్‌లో వచ్చిన బాయిల్డ్ రకం ధాన్యాన్ని బాయిల్డ్ మిల్లులకే దింపుకునేలా చూడాలని సంఘం కోరింది. ప్రతి గింజను బాయిల్డ్ బియ్యంగా ఇచ్చేందుకు సిద్ధంగా ఉన్నామని తెలిపింది.

ప్రభుత్వం ఆ విధంగా అనుమతించకపోతే ఇతర మార్గాల ద్వారా మిల్లర్ల నుంచి ధాన్యాన్ని వేగంగా తరలించేలా చర్యలు తీసుకోవాలని కోరింది. దీనివల్ల వచ్చే షార్టేజీ, డబ్బుల చెల్లింపులు లేదా CMR డెలివరీకి సంబంధించిన సమస్యలను ప్రభుత్వం స్పష్టంగా పరిష్కరించాలని విజ్ఞప్తి చేసింది.

నాన్-ఎఫ్‌ఏక్యూ ధాన్యంపై ప్రత్యేక ఆర్థిక సాయం కోరిన మిల్లర్లు

రైతుల నుంచి నిబంధనలకు భిన్నంగా వచ్చిన Non-FAQ ధాన్యాన్ని మిల్లులకు చేర్చడం వల్ల మిల్లర్లు నష్టపోతున్నారని సంఘం పేర్కొంది. FCI, సివిల్ సప్లైస్ నిబంధనల ప్రకారం నాణ్యత లేని ధాన్యానికి సంబంధించి పాస్ కావాలంటే తప్పనిసరిగా సార్టెక్స్ (Sortex) చేయాల్సి వస్తోందని తెలిపింది.

దీంతో సుమారు 10 శాతం వరకు డిస్‌కలర్, డ్రామేజ్ వస్తుందని, ఈ ధాన్యాన్ని లిక్కర్, ఇథనాల్ ఫ్యాక్టరీలకు తక్కువ ధరకు విక్రయించాల్సి వస్తోందని సంఘం పేర్కొంది. దీంతో క్వింటాల్‌కు సుమారు రూ.750 నుంచి రూ.1,000 వరకు నష్టం వస్తోందని వివరించింది.

ఈ నష్టాన్ని ప్రభుత్వం పరిగణనలోకి తీసుకుని మిల్లర్లకు ప్రత్యేక పరిహారం లేదా ఆర్థిక సహాయం అందించాలని కోరింది. అలాగే క్వింటాల్‌కు సుమారు 67 కిలోల రికవరీ మాత్రమే రావడం వల్ల అదనపు ఆర్థిక భారం పడుతోందని పేర్కొంది.

తొమ్మిది నెలల ప్రభుత్వ బకాయిలు చెల్లించాలని డిమాండ్

KMS 2025–26 ఖరీఫ్ ధాన్యాన్ని మిల్లుల్లో దిగుమతి చేసిన తర్వాత కూడా దాదాపు 9 నెలల వరకు ప్రభుత్వం CMR తీసుకోలేదని సంఘం ఆరోపించింది. సుదీర్ఘకాలం ధాన్యం నిల్వ ఉండటంతో నాణ్యత దెబ్బతినడంతో పాటు మిల్లర్లు ఆర్థికంగా ఇబ్బందులు ఎదుర్కొన్నారని తెలిపింది.

ముఖ్యంగా ఒక ప్రాంతంలో 41 కిలోలు ఉన్న బస్తా నెమ్మదిగా 37 కిలోలకు తగ్గిందని, అంటే సుమారు 10 శాతం వరకు తరుగుదల కనిపించిందని సంఘం పేర్కొంది. ఈ తరుగుదల ధాన్యం నాణ్యత, నిల్వ కాలం, ప్రకృతి పరిస్థితులు, ఎండబెట్టడం వంటి కారణాలతో ఏర్పడిందని, మిల్లర్ల నిర్లక్ష్యం వల్ల కాదని స్పష్టం చేసింది. అందువల్ల డ్రైయింగ్ లాస్ పేరుతో మిల్లర్లపై అదనపు భారాన్ని మోపవద్దని కోరింది.

ఓపెన్ స్టాక్, గోదాముల సమస్యలు పరిష్కరించాలి

KMS 2025–26 సీజన్‌లో ప్రభుత్వ అధికారులు, ఒడిశా మిల్లర్లు, రైతులకు సంబంధించిన సమస్యల కారణంగా మిల్లుల్లో ఓపెన్ స్టాక్ రూపంలో ధాన్యం నిలిచిపోయిందని సంఘం పేర్కొంది.

మిల్లుల్లో ధాన్యం దిగుమతి చేసి చాలాకాలం గడిచినా బాయిల్డ్ చేయడానికి నిర్దిష్ట టార్గెట్ లేకపోవడం, గోదాముల్లో స్థలం లేకపోవడం వంటి కారణాలతో ఇబ్బందులు ఎదురయ్యాయని తెలిపింది. వెంటనే FCI లేదా సంబంధిత శాఖల ద్వారా బాయిల్డ్ బియ్యం తీసుకునేలా చర్యలు తీసుకోవడంతో పాటు గోదాముల్లో అందుబాటులో ఉన్న స్థలాన్ని కేటాయించాలని కోరింది.

భౌతిక తనిఖీల్లో నిబంధనలు పాటించాలని విజ్ఞప్తి

Physical Verification పేరుతో మిల్లర్లపై ఒత్తిడి చేయవద్దని సంఘం కోరింది. తమ వద్ద ఉన్న సరుకు, గోదాముల్లోని స్టాక్, మిల్లుల పరిస్థితిని పరిశీలించేటప్పుడు సరైన విధానాన్ని పాటించాలని విజ్ఞప్తి చేసింది.

మిల్లర్లకు ముందస్తు సమాచారం లేకుండా లేదా సరైన ప్రక్రియను పాటించకుండా ఆకస్మిక తనిఖీలు నిర్వహించడం వల్ల ఇబ్బందులు తలెత్తుతున్నాయని పేర్కొంది. తనిఖీలకు సంబంధించి స్పష్టమైన విధానం, సరైన రికార్డుల పరిశీలన, చట్టబద్ధమైన ప్రక్రియను పాటించాలని కోరింది. CMR గడువులను కూడా పరిగణనలోకి తీసుకుని మిల్లర్లపై అనవసరమైన చర్యలు తీసుకోవద్దని విజ్ఞప్తి చేసింది.

డిఫాల్ట్ మిల్లర్లపై ఫైన్లు మాఫీ చేయాలని విజ్ఞప్తి

డిఫాల్ట్ మిల్లర్లపై విధిస్తున్న 25 శాతం–12 శాతం ఫైన్‌ను మాఫీ చేయాలని జిల్లా రైస్ మిల్లర్ల అసోసియేషన్ కోరింది. రాష్ట్ర అసోసియేషన్ మిల్లర్ల తరఫున చేపడుతున్న సమస్యల పరిష్కార కార్యక్రమానికి తమ వంతు సహకారం అందిస్తామని తెలిపింది.

గతంలో జిల్లా కలెక్టర్ ప్రత్యేక చొరవ తీసుకుని తమ న్యాయమైన డిమాండ్లను ప్రభుత్వం, పౌర సరఫరాల శాఖ ఉన్నతాధికారుల దృష్టికి తీసుకెళ్లాలని సంఘం కోరింది.

CMR డెలివరీలు, షార్టేజీ, రబీ 2025–26 బాయిల్డ్ ధాన్యం, నాన్-ఎఫ్‌ఏక్యూ ధాన్యం వల్ల కలిగే నష్టం, డ్రైయింగ్ లాస్, ఓపెన్ స్టాక్, ఫిజికల్ వెరిఫికేషన్, డిఫాల్ట్ మిల్లర్లపై ఫైన్లకు సంబంధించిన సమస్యలను ప్రభుత్వం సానుకూలంగా పరిశీలించాలని కామారెడ్డి జిల్లా రైస్ మిల్లర్స్ అసోసియేషన్ విజ్ఞప్తి చేసింది.

మిల్లర్ల సమస్యల పరిష్కారానికి జిల్లా అధికారులు ప్రత్యేక దృష్టి సారించి, సంబంధిత శాఖలతో సమన్వయం చేసుకుని CMR ప్రక్రియను వేగవంతం చేయడంతో పాటు మిల్లర్లపై పడుతున్న ఆర్థిక భారాన్ని తగ్గించేలా చర్యలు తీసుకోవాలని సంఘం కోరింది.

ఈ వినతిపత్రంపై కామారెడ్డి జిల్లా రైస్ మిల్లర్స్ అసోసియేషన్ అధ్యక్షుడు పి. రాజేంద్ర ప్రసాద్, ప్రధాన కార్యదర్శి కె. సంతోష్ కుమార్, కోశాధికారి ఎం. సుధర్శన్, వర్కింగ్ ప్రెసిడెంట్ వి. లక్ష్మణ్ పేర్లు ఉన్నాయి.