ఉద్యోగులు, ఉపాధ్యాయుల సమస్యలను ఈ నెల 18లోగా పరిష్కరించాలని టీఆర్ఎస్ పార్టీ చీఫ్ కల్వకుంట్ల కవిత డిమాండ్ చేశారు. హామీలు అమలు చేయకపోతే హైదరాబాద్ దిగ్భంధానికి ఉద్యోగ సంఘాలు సిద్ధం కావాలని ఆమె పిలుపునిచ్చారు. ఉద్యోగ, ఉపాధ్యాయ సమస్యలపై తెలంగాణ రక్షణ సేన ఆధ్వర్యంలో నిర్వహించిన సదస్సులో కవిత పాల్గొని మాట్లాడారు.

రాష్ట్ర ప్రభుత్వ ఉద్యోగులు, ఉపాధ్యాయులను ప్రభుత్వం నిర్లక్ష్యం చేస్తోందని కవిత ఆరోపించారు. సమస్యలు పరిష్కరించాలని కోరుతున్న ఉద్యోగులను బెదిరించడం సరికాదని, ఉద్యోగులు ప్రభుత్వానికి బానిసలు కాదని ఆమె వ్యాఖ్యానించారు. ఉద్యోగ సంఘాలు చేపట్టే పోరాటాలకు టీఆర్ఎస్ అన్ని విధాలుగా మద్దతు ఇస్తుందని తెలిపారు.

ఉద్యోగులు, ఉపాధ్యాయుల సమస్యలపై కవిత

తెలంగాణ ఉద్యమ సమయంలో ఉపాధ్యాయులు ఉద్యోగం కంటే ఉద్యమానికే ప్రాధాన్యత ఇచ్చి పోరాడారని కవిత పేర్కొన్నారు. ఏ ప్రభుత్వం అయినా ప్రజలకు మెరుగైన, పారదర్శకమైన పాలన అందించాలంటే ప్రభుత్వ ఉద్యోగుల సహకారం అవసరమని అన్నారు. అయితే ప్రస్తుత ప్రభుత్వం ఉద్యోగులను చిన్నచూపు చూస్తోందని ఆరోపించారు.

ప్రభుత్వ ఉద్యోగులు, ఉపాధ్యాయులకు ఎన్నికలకు ముందు పలు హామీలు ఇచ్చారని, అధికారంలోకి వచ్చిన తర్వాత వాటిని పట్టించుకోవడం లేదని కవిత విమర్శించారు. రాష్ట్రంలో ఉద్యోగులు, ఉపాధ్యాయులు సంతోషంగా లేరని ఆమె అన్నారు.

ప్రభుత్వ విద్యపై విమర్శలు

తెలంగాణలో ఉచిత విద్య, వైద్యం అందించాలనే లక్ష్యంతో తమ పార్టీ పనిచేస్తుందని కవిత చెప్పారు. ప్రభుత్వ విద్యను కాంగ్రెస్ ప్రభుత్వం నిర్లక్ష్యం చేస్తోందని ఆరోపించారు.

రాష్ట్రంలో దాదాపు 600 మండలాలు ఉన్నప్పటికీ కేవలం ఎనిమిది మంది మాత్రమే పర్మినెంట్ ఎంఈఓలు ఉన్నారని ఆమె పేర్కొన్నారు. దీంతో ప్రభుత్వ పాఠశాలల పర్యవేక్షణ సరిగా జరగడం లేదని అన్నారు. హెడ్‌మాస్టర్లు, సీనియర్ టీచర్లను ఎంఈఓలుగా నియమిస్తున్నారని చెప్పారు.

టీచర్లకు బోధనకు ఆటంకం కలిగించే విధంగా వివిధ రిపోర్టులు, ఇతర పనులు అప్పగిస్తున్నారని కవిత ఆరోపించారు. ఒకే టీచర్ ఉన్న పాఠశాలల్లో పరిస్థితులు దారుణంగా ఉన్నాయని, ఉపాధ్యాయులకు సీనియారిటీ ఆధారంగా రావాల్సిన ప్రమోషన్లు కూడా ఇవ్వడం లేదని పేర్కొన్నారు.

గురుకులాలు, డిగ్రీ కాలేజీల్లో ఖాళీలు ఉన్నాయని, వాటిని భర్తీ చేయడం లేదని కవిత విమర్శించారు. ఉన్న ఉపాధ్యాయులను కూడా ప్రభుత్వం సరిగా చూసుకోవడం లేదని ఆరోపించారు.

DA, PRC, OPS అంశాలపై డిమాండ్లు

పెరిగిన ధరలకు అనుగుణంగా ఉద్యోగులకు డీఏ ఇవ్వాల్సి ఉన్నప్పటికీ 32 నెలలుగా డీఏ ఇవ్వడం లేదని కవిత ఆరోపించారు. ఉద్యోగుల పీఆర్సీ గడువు ముగిసే పరిస్థితి ఉందని, వారికి వెంటనే 51 శాతం ఫిట్‌మెంట్ ఇవ్వాలని డిమాండ్ చేశారు.

2003లో నియమితులైన పోలీసులతో పాటు అదే ఏడాది నియమితులైన ఉపాధ్యాయులకు కూడా ఓపీఎస్ ఇవ్వాలని ఆమె కోరారు. 2003లో నియమితులైన టీచర్లను ఓపీఎస్‌కు మార్చడం ద్వారా ప్రభుత్వానికి రూ.2 వేల కోట్లు ఆదా అవుతాయని కవిత పేర్కొన్నారు.

317 జీవో బాధితులకు న్యాయం చేయాలి

ఉద్యోగ సంఘాలు డిమాండ్ చేస్తున్న 37 అంశాల్లో చాలా వరకు ఆర్థిక అంశాలతో సంబంధం లేనివేనని ఆమె అన్నారు. ముఖ్యంగా 317 జీవో బాధితులకు న్యాయం చేయాలని డిమాండ్ చేశారు.

317 జీవో బాధితుల్లో మహిళా ఉద్యోగులు ఎక్కువగా ఉన్నారని, వారి ఇబ్బందులు తనను బాధిస్తున్నాయని కవిత పేర్కొన్నారు. గత ప్రభుత్వంలో వారికి న్యాయం చేసేందుకు తాను చేసిన ప్రయత్నం ఫలించలేదని ఆమె తెలిపారు.

18లోగా సమస్యలు పరిష్కరించాలి

ముఖ్యమంత్రి ఈ నెల 18 వరకు సమస్యలను పరిష్కరిస్తామని చెప్పారని కవిత తెలిపారు. అప్పటిలోగా సమస్యలు పరిష్కారం కాకపోతే హైదరాబాద్ దిగ్భంధానికి ఉద్యోగ సంఘాలు పిలుపునివ్వాలని ఆమె కోరారు.

ఉద్యోగ సంఘాలు ప్రభుత్వంపై పోరాటం విషయంలో ఆందోళనలను పదేపదే వాయిదా వేస్తున్నాయని కవిత వ్యాఖ్యానించారు. దాదాపు 206 ప్రభుత్వ ఉద్యోగ సంఘాలు జేఏసీగా పోరాటం చేస్తున్నాయని, అందుకే తాము వారికి మద్దతుగా సంయమనంతో ఉన్నామని చెప్పారు.

ఉద్యోగ సంఘాలు చేసే ఏ ఆందోళనకైనా తాము నైతిక మద్దతు ఇస్తామని కవిత హామీ ఇచ్చారు. ఉద్యోగులు ప్రభుత్వానికి బానిసలు కాదని ఆమె వ్యాఖ్యానించారు.

అవుట్‌సోర్సింగ్ ఉద్యోగుల సమస్యలు పరిష్కరించాలని డిమాండ్

అవుట్‌సోర్సింగ్ ఉద్యోగుల సమస్యలను కూడా ప్రభుత్వం పరిష్కరించాలని కవిత కోరారు. జీతాలు ఆలస్యమైనప్పటికీ ప్రజలకు ఇబ్బంది కలగకూడదనే ఉద్దేశంతో వారు పనిచేస్తున్నారని పేర్కొన్నారు. వారికి రావాల్సిన బకాయి జీతాలను వెంటనే చెల్లించాలని డిమాండ్ చేశారు.

రేవంత్ రెడ్డిపై కవిత విమర్శలు

మాట తప్పడం, మడమ తిప్పడం ముఖ్యమంత్రి రేవంత్ రెడ్డి ట్రేడ్‌మార్క్ అంటూ కవిత విమర్శించారు. గతంలో ఉద్యోగుల సమస్యలపై రేవంత్ రెడ్డి విమర్శలు చేశారని, ఇప్పుడు అధికారంలోకి వచ్చిన తర్వాత వాటి పరిష్కారానికి చర్యలు తీసుకోవడం లేదని ఆమె ఆరోపించారు.

ఉద్యోగులు తమ ప్రయోజనాలు, బెనిఫిట్స్ అడిగితే మరో రెండేళ్లు వేచి ఉండాలని చెప్పడం సరికాదని కవిత అన్నారు. ఉద్యోగులు ప్రభుత్వానికి బానిసలు కాదని వ్యాఖ్యానించారు.

ప్రభుత్వ ఉద్యోగులకు ఇచ్చిన హెల్త్ కార్డు ప్రైవేట్ ఆసుపత్రుల్లో పనిచేస్తుందా అంటూ ముఖ్యమంత్రికి కవిత సవాల్ విసిరారు. హెల్త్ కార్డు పనిచేస్తే తాము ఏం చేయమంటే అది చేస్తామని, లేదంటే ముఖ్యమంత్రి రాజీనామా చేస్తారా అని ప్రశ్నించారు.

సదస్సు ఫొటోలు

ఈ వార్తను షేర్ చేయండి

WhatsApp Facebook Instagram Telegram X Email Copy Link