గ్రామ సర్పంచులు తమ గ్రామంలోని జనరల్ ఫండ్‌ను స్వయంగా వినియోగించుకునే విధంగా రాష్ట్ర ప్రభుత్వం చేసిన చట్ట సవరణకు తెలంగాణ సర్పంచుల ఫోరం రాష్ట్ర కమిటీ తరఫున ధన్యవాదాలు తెలిపినట్లు ఫోరం రాష్ట్ర ప్రధాన కార్యదర్శి కందుల వెంకటేశ్వర్లు తెలిపారు. త్రిపురారం మండల కేంద్రంలో ఏర్పాటు చేసిన సమావేశంలో ఆయన ఈ విషయాన్ని వెల్లడించారు.

ఈ సందర్భంగా కందుల వెంకటేశ్వర్లు మాట్లాడుతూ సర్పంచులు దశాబ్దాలుగా ఎదుర్కొంటున్న జనరల్ ఫండ్ వినియోగ సమస్యపై రాష్ట్ర ప్రభుత్వం తీసుకున్న నిర్ణయం హర్షణీయమని పేర్కొన్నారు. ఈ నిర్ణయానికి ముఖ్యమంత్రి రేవంత్ రెడ్డి, పంచాయతీరాజ్ శాఖ మంత్రి సీతక్క, పంచాయతీరాజ్ శాఖ కమిషనర్ దివ్య దేవరాజ్‌కు సర్పంచుల ఫోరం రాష్ట్ర కమిటీ తరఫున ధన్యవాదాలు తెలిపారు.

అదేవిధంగా జాయింట్ చెక్ పవర్‌పై ఉన్న షరతులను సవరించి కొంతమేర ఉపశమనం కల్పించినప్పటికీ, ఉపసర్పంచులకు ఉన్న జాయింట్ చెక్ పవర్‌ను శాశ్వతంగా రద్దు చేయాలని డిమాండ్ చేశారు.

సర్పంచుల సమస్యలు పరిష్కరించాలని విజ్ఞప్తి

సర్పంచులు ఎదుర్కొంటున్న అనేక సమస్యలను ప్రభుత్వం చిత్తశుద్ధితో పరిష్కరించాలని కందుల వెంకటేశ్వర్లు విజ్ఞప్తి చేశారు. సర్పంచుల గౌరవేతనాన్ని రూ.6,500 నుంచి రూ.25 వేలకు పెంచాలని సర్పంచుల ఫోరం డిమాండ్ చేస్తున్నట్లు తెలిపారు.

గ్రామపంచాయతీలను ప్రత్యేక ప్రభుత్వాలుగా గుర్తించేలా చట్ట సవరణ చేయాలని కోరారు. రాష్ట్రానికి, దేశానికి గ్రామాల ఆదాయంతోనే తలసరి ఆదాయం పెరుగుతుందని పేర్కొంటూ, గ్రామాల అభివృద్ధికి అందుకు అనుగుణంగా నిధులు కేటాయించడం లేదని ఆవేదన వ్యక్తం చేశారు.

పట్టణాల అభివృద్ధిపై చూపుతున్న శ్రద్ధను గ్రామాల అభివృద్ధిపైనా ప్రభుత్వాలు చూపాలని కోరారు. గ్రామాలకు కేటాయిస్తున్న నిధులు అరకొరగా ఉండటంతో గ్రామాల్లో మౌలిక సదుపాయాలు కల్పించడానికి కూడా ఇబ్బందులు ఎదురవుతున్నాయని ఆయన పేర్కొన్నారు.

సమావేశంలో పాల్గొన్న సర్పంచులు

ఈ సమావేశంలో సర్పంచులు గుండెబోయిన వెంకటేశ్వర్లు, సతీష్, ధనవతవెంకట్రావు, సఫియా బేగం, పుల్లయ్య, అశోక్ గౌడ్, మధు తదితరులు పాల్గొన్నారు.