మేడ్చల్–మల్కాజిగిరి జిల్లా కీసర సర్కిల్ పరిధిలోని జవహర్ నగర్‌లో మల్కాజిగిరి మున్సిపల్ జోనల్ కమిషనర్ సంచి గంగావర్ శుక్రవారం పర్యటించారు. ఈ సందర్భంగా పలు కాలనీల్లో నెలకొన్న సమస్యలను ఆమె పరిశీలించారు.

కమిషనర్ వెంట స్థానిక సీనియర్ బీజేపీ నాయకులు, మాజీ కార్పొరేటర్ బాబు పలు కాలనీల్లోని సమస్యలను చూపించారు. వాటిని పరిష్కరించాలని కోరారు.

ఓపెన్ నాలాల నిర్మాణానికి చర్యలు

భక్తబాయి, న్యూ వెంకటేశ్వర కాలనీ, ముత్తుస్వామి కాలనీల్లో ఉన్న ఓపెన్ నాలాల నిర్మాణాన్ని విడతల వారీగా చేపడతామని కమిషనర్ తెలిపారు. వర్షాకాలంలో ప్రజలు ఎదుర్కొంటున్న సమస్యలకు పరిష్కారం చూపుతామని పేర్కొన్నారు.

లక్ష్మీ నరసింహ స్వామి కాలనీ ఎదురుగా ఓరిని పూడ్చివేసి నీరు వెళ్లకుండా నిర్మాణాలు జరుగుతున్న విషయాన్ని కమిషనర్ దృష్టికి తీసుకువచ్చారు. దీంతో వాటిని తొలగించి వర్షపు నీరు సాఫీగా వెళ్లేలా చూడాలని స్థానిక అధికారులను ఆమె ఆదేశించారు.

ప్రధాన సమస్యలకు విడతల వారీగా నిధులు

జవహర్ నగర్‌లో నెలకొన్న ప్రధాన సమస్యల పరిష్కారానికి విడతల వారీగా ప్రభుత్వ నిధులు కేటాయిస్తామని కమిషనర్ తెలిపారు. అత్యవసర పరిస్థితులు నెలకొన్న కాలనీల్లోని సమస్యలను ప్రభుత్వం ద్వారా పరిష్కరించేందుకు చర్యలు తీసుకుంటామని పేర్కొన్నారు.

కమిషనర్ ఆకస్మిక పర్యటనపై ఆయా కాలనీల ప్రజలు ఆనందం వ్యక్తం చేశారు. ఆమె వెంట నడుస్తూ తమ ప్రాంతాల్లోని సమస్యలను కమిషనర్‌కు వివరించారు.