గార్ల మేజర్ గ్రామ పంచాయతీని అన్ని రంగాల్లో అభివృద్ధి చేయడమే లక్ష్యంగా పనిచేస్తున్నామని సర్పంచ్ బానోత్ పార్వతి హతీరామ్ పేర్కొన్నారు. శనివారం ఉదయం 10 గంటలకు వర్తక సంఘం భవనంలో శ్రీరామదండు 108 కమిటీ ఆధ్వర్యంలో ఆఖిలపక్ష నాయకులు, పుర ప్రముఖుల భాగస్వామ్యంతో ప్రత్యేక సామాజిక సంస్కరణ సమావేశం నిర్వహించారు.

నిరుపేద కుటుంబాలకు ఉచిత ఫ్రీజర్ బాక్స్

మానవ జీవితంలో అత్యంత బాధాకరమైన సమయంలో నిరుపేద కుటుంబాలకు ఆసరాగా ఉండేందుకు దివంగత వోబిలిశెట్టి వెంకటనర్సయ్య–సుశీలమ్మ దంపతుల జ్ఞాపకార్థం వారి కుమారులు ఉచితంగా డెడ్ బాడీ ఫ్రీజర్ బాక్స్‌ను విరాళంగా అందజేశారు.

వోబిలిశెట్టి కుటుంబ సభ్యుల ఉదారతను సర్పంచ్, శ్రీరామదండు 108 కమిటీ సభ్యులు అభినందిస్తూ కృతజ్ఞతలు తెలిపారు.

గ్రామ సమస్యలపై వినతిపత్రం

గ్రామంలోని మౌలిక వసతులు, అంతిమ సంస్కారాల నిర్వహణలో ఎదురవుతున్న ఇబ్బందులపై శ్రీరామదండు 108 కమిటీ ప్రతినిధులు సర్పంచ్ దృష్టికి పలు అంశాలను తీసుకువచ్చారు.

• గార్ల స్మశాన వాటిక వద్ద గది, బోరు బావి, నీటి ట్యాంక్ నిర్మాణం.
• 1 నుంచి 5 వార్డుల ప్రజల కోసం అప్పసముద్రం చెరువు సమీపంలో వైకుంఠధామం ఏర్పాటు.
• గ్రామానికి ప్రత్యేకంగా “వైకుంఠ రథం” ఏర్పాటు చేయడం.
• దేవాలయాల వద్ద సోలార్ లైట్ల అమరిక.
• ప్రమాదాల నివారణకు ప్రధాన కూడళ్లలో స్పీడ్ బ్రేకర్ల ఏర్పాటు.

నెల రోజుల్లో సమస్యలు పరిష్కరిస్తామని హామీ

కమిటీ ప్రతిపాదనలపై సర్పంచ్ బానోత్ పార్వతి సానుకూలంగా స్పందించారు. గ్రామాభివృద్ధి, ప్రజల సంక్షేమానికి తమ పాలకవర్గం కట్టుబడి ఉందని తెలిపారు.

కమిటీ దృష్టికి తీసుకొచ్చిన సమస్యలన్నింటినీ నెల రోజుల వ్యవధిలో పరిష్కరిస్తామని హామీ ఇచ్చారు.

ఈ కార్యక్రమంలో శ్రీరామదండు 108 కమిటీ ప్రతినిధులు, వివిధ రాజకీయ పార్టీల నాయకులు, వర్తక సంఘం ప్రతినిధులు, గ్రామ పుర ప్రముఖులు పెద్ద సంఖ్యలో పాల్గొన్నారు.