కామారెడ్డి అభివృద్ధికి ప్రభుత్వం కట్టుబడి ఉంది: మహమ్మద్ అలీ షబ్బీర్

కామారెడ్డి పట్టణంలోని 15, 16వ వార్డుల్లో ప్రభుత్వ సలహాదారు మహమ్మద్ అలీ షబ్బీర్ శుక్రవారం విస్తృతంగా పర్యటించారు. ఆయా వార్డుల్లో ప్రజలను నేరుగా కలిసి వారి సమస్యలను అడిగి తెలుసుకున్నారు. ప్రజలు తెలిపిన సమస్యలను సంబంధిత అధికారుల దృష్టికి తీసుకెళ్లి త్వరితగతిన పరిష్కరించాలని అధికారులను ఆదేశించారు.

అనంతరం 15, 16వ వార్డుల్లో చేపట్టనున్న పలు అభివృద్ధి పనులకు, ముఖ్యంగా సీసీ రోడ్డు నిర్మాణ పనులకు షబ్బీర్ అలీ శంకుస్థాపన చేశారు.

🔊 వార్తను వినండి

ప్రతి వార్డులో మౌలిక వసతులు మెరుగుపడాలి

ఈ సందర్భంగా షబ్బీర్ అలీ మాట్లాడుతూ, కామారెడ్డి పట్టణ అభివృద్ధి తన వ్యక్తిగత బాధ్యతగా భావిస్తున్నానని తెలిపారు. ప్రజలకు ఏ సమస్య వచ్చినా అధికారులు, ప్రజాప్రతినిధులతో సమన్వయం చేసుకుంటూ పరిష్కరించేందుకు నిరంతరం కృషి చేస్తానని పేర్కొన్నారు.

అభివృద్ధి అనేది కేవలం పెద్ద ప్రాజెక్టులతోనే కాకుండా ప్రతి వార్డులో రోడ్లు, డ్రైనేజీ, తాగునీరు, పారిశుధ్యం, వీధి దీపాలు వంటి మౌలిక వసతులు మెరుగుపడినప్పుడే సాధ్యమవుతుందని అన్నారు.

ముఖ్యమంత్రి ఎ. రేవంత్ రెడ్డి కామారెడ్డి నుంచి పోటీ చేసిన సమయంలో ఈ ప్రాంత ప్రజలతో ఏర్పడిన అనుబంధం కారణంగా కామారెడ్డి అభివృద్ధిపై ప్రత్యేక దృష్టి పెట్టారని షబ్బీర్ అలీ తెలిపారు. కామారెడ్డి ప్రజలు ముఖ్యమంత్రి రేవంత్ రెడ్డికి ఇచ్చిన ప్రేమ, ఆదరణను ప్రభుత్వం ఎప్పటికీ మరచిపోదని పేర్కొన్నారు.

పట్టణంలో రోడ్లు, డ్రైనేజీలు, తాగునీరు, చెరువుల అభివృద్ధి, విద్య, వైద్యం, క్రీడా మౌలిక వసతులు వంటి అనేక రంగాల్లో అభివృద్ధి పనులు చేపడుతున్నామని తెలిపారు.

సంక్షేమ పథకాలపై షబ్బీర్ అలీ ప్రస్తావన

కాంగ్రెస్ ప్రభుత్వం అధికారంలోకి వచ్చిన తర్వాత అభివృద్ధి, సంక్షేమం రెండింటినీ సమానంగా ముందుకు తీసుకెళ్తోందని షబ్బీర్ అలీ అన్నారు.

పేదల సొంతింటి కలను నెరవేర్చేందుకు ఇందిరమ్మ ఇళ్ల పథకాన్ని అమలు చేస్తున్నామని, అర్హులైన కుటుంబాలకు ఇళ్ల నిర్మాణానికి ప్రభుత్వం ఆర్థిక సహాయం అందిస్తోందని తెలిపారు. రాష్ట్రవ్యాప్తంగా తొలి దశలో 4.50 లక్షల ఇందిరమ్మ ఇళ్లకు మంజూరు ఇచ్చినట్లు ప్రభుత్వం ప్రకటించిందని పేర్కొన్నారు.

అలాగే పేద, మధ్యతరగతి కుటుంబాలకు ప్రయోజనం కలిగేలా 200 యూనిట్ల వరకు ఉచిత విద్యుత్, రూ.500కే గ్యాస్ సిలిండర్, మహిళలకు ఉచిత ఆర్టీసీ బస్సు ప్రయాణం, కొత్త రేషన్ కార్డులు, సన్నబియ్యం పంపిణీ, రైతులకు మద్దతు వంటి సంక్షేమ కార్యక్రమాలను ప్రభుత్వం అమలు చేస్తోందని చెప్పారు.

కాంగ్రెస్ ప్రభుత్వం మాటల ప్రభుత్వం కాదు.. చేతల ప్రభుత్వమని, ప్రజలకు ఇచ్చిన హామీలను ఒక్కొక్కటిగా అమలు చేస్తూ ముందుకు వెళ్తున్నామని షబ్బీర్ అలీ అన్నారు. పేదల సంక్షేమం, రైతుల అభివృద్ధి, మహిళల ఆర్థిక సాధికారత, యువతకు ఉద్యోగ–ఉపాధి అవకాశాలు, విద్యా–వైద్య రంగాల బలోపేతం తమ ప్రభుత్వ ప్రధాన లక్ష్యాలని పేర్కొన్నారు.

అభివృద్ధి పనులు నాణ్యతతో పూర్తి చేయాలి

కామారెడ్డి పట్టణానికి అవసరమైన అభివృద్ధి పనులకు నిధులు సమకూర్చేందుకు ప్రభుత్వం వద్ద నిరంతరం కృషి చేస్తున్నామని షబ్బీర్ అలీ తెలిపారు.

వార్డుల్లో ప్రజలు ఎదుర్కొంటున్న ప్రతి సమస్యను తమ దృష్టికి తీసుకురావాలని, ప్రజల మధ్యకు వచ్చి సమస్యలను తెలుసుకుని వాటికి పరిష్కారం చూపించడం తమ బాధ్యత అని అన్నారు. 15, 16వ వార్డుల్లో ప్రారంభించిన అభివృద్ధి పనులు త్వరగా పూర్తయ్యేలా అధికారులు చర్యలు తీసుకోవాలని, నాణ్యత విషయంలో ఎలాంటి రాజీ ఉండకూడదని సూచించారు.

కామారెడ్డి పట్టణంలోని ప్రతి వార్డును సమగ్రంగా అభివృద్ధి చేసి, ప్రజలకు మెరుగైన మౌలిక వసతులు అందించడమే లక్ష్యంగా ప్రభుత్వం ముందుకు సాగుతోందని షబ్బీర్ అలీ స్పష్టం చేశారు.

“కామారెడ్డి అభివృద్ధి ఆగదు.. ప్రజల సమస్యల పరిష్కారం ఆగదు. కాంగ్రెస్ ప్రభుత్వం ప్రజల ప్రభుత్వం. ప్రజల ఆశలు, ఆకాంక్షలకు అనుగుణంగా కామారెడ్డిని మరింత అభివృద్ధి చెందిన పట్టణంగా తీర్చిదిద్దేందుకు అందరం కలిసి పనిచేద్దాం” అని ఆయన పిలుపునిచ్చారు.

కార్యక్రమంలో పాల్గొన్న వారు

ఈ కార్యక్రమంలో మున్సిపల్ చైర్మన్ ఇప్ప ఉమారాణి శ్రీనివాస్, మాజీ డీసీసీ అధ్యక్షులు కైలాస్ శ్రీనివాస్, స్థానిక కౌన్సిలర్లు ప్రియాంక సంతోష్, వనిత రామ్మోహన్, కౌన్సిలర్లు అంజాద్, వాజీద్, మజీద్, సిద్ధికి, గణేష్, చిట్టిబాబు, భూపతి, సత్యం, సొసైటీ చైర్మన్ గూడెం శ్రీనివాస్ రెడ్డి, పండ్ల రాజు, అశోక్ రెడ్డి, మోహనరెడ్డి, వైద్య కిషన్, నౌసిలాల్, గణేష్ నాయక్, ఎస్సీ సెల్ జిల్లా అధ్యక్షులు బాలరాజు, మాజీ గ్రంథాలయ చైర్మన్ పున్నమి రాజేశ్వర్, వార్డు ప్రజలు, మహిళలు, నాయకులు పాల్గొన్నారు.

0 మంది ఇష్టపడ్డారు
షేర్
డౌన్‌లోడ్న్యూస్ పేపర్ క్లిప్పింగ్ • హై క్వాలిటీ

మరిన్ని వార్తలు

వ్యాఖ్యానించండి