హైదరాబాద్: సాహితి ఇన్‌ఫ్రాటెక్ వెంచర్స్ ఇండియా ప్రైవేట్ లిమిటెడ్‌పై నమోదైన మనీలాండరింగ్ కేసులో కాంగ్రెస్ ఎమ్మెల్యే అరికెపూడి గాంధీకి ఎన్‌ఫోర్స్‌మెంట్ డైరెక్టరేట్ (ఈడీ) సమన్లు జారీ చేసింది. సెప్టెంబర్ 27న హాజరు కావాలని ఈడీ ఆదేశించినట్లు సమాచారం.

ఈ కేసులో ఎమ్మెల్యే బ్యాంక్ ఖాతాల ద్వారా సాహితి ఇన్‌ఫ్రా నుంచి రూ.2.1 కోట్లు మళ్లించినట్లు ఆరోపణలు ఉన్నాయి. ఈ రూ.2.1 కోట్ల లావాదేవీలపై ఈడీ ఆరా తీస్తోంది. ఆ లావాదేవీల స్వభావం, ఉద్దేశంపై దర్యాప్తు కొనసాగుతోంది.

రూ.842 కోట్ల మోసం అంచనా

సాహితి ఇన్‌ఫ్రా ప్రాజెక్టుల్లో తొలుత రూ.248 కోట్ల మోసం జరిగినట్లు ఆరోపణలు వచ్చాయి. తదుపరి దర్యాప్తులో మోసం విలువ సుమారు రూ.842 కోట్లుగా ఈడీ అంచనా వేసినట్లు తెలిసింది.

ఫ్లాట్లు, విల్లాలు నిర్మిస్తామని కొనుగోలుదారుల నుంచి డబ్బులు వసూలు చేసి మోసం చేశారనే ఆరోపణలు ఉన్నాయి. ప్రాజెక్టులను సకాలంలో పూర్తి చేయలేదంటూ కొనుగోలుదారులు ఫిర్యాదులు చేశారు. ప్రీ-లాంచ్ ఆఫర్ల పేరుతో కొనుగోలుదారుల నుంచి భారీగా నిధులు సేకరించినట్లు, ఆ నిధులను సొంత, కుటుంబ సభ్యుల ఖాతాలకు మళ్లించినట్లు ఆరోపణలు ఉన్నాయి.

తెలంగాణ పోలీసులు నమోదు చేసిన ఎఫ్‌ఐఆర్‌ల ఆధారంగా ఈడీ ఈ దర్యాప్తు చేపట్టింది.

సంస్థ ఎండీ, మాజీ డైరెక్టర్‌పై అభియోగాలు

సంస్థ ఎండీ బి. లక్ష్మీనారాయణ, మాజీ డైరెక్టర్ సందు పూర్ణచంద్రరావుపై అభియోగాలు ఉన్నాయి. దాదాపు రూ.126 కోట్ల నిధుల దుర్వినియోగం జరిగినట్లు ఈడీ ఆరోపిస్తోంది. బినామీ పేర్లతో ఆస్తులు కొనుగోలు చేసినట్లు దర్యాప్తులో గుర్తించినట్లు తెలిసింది.

56 బ్యాంక్ ఖాతాల ఫ్రీజ్

ఇప్పటివరకు 56 బ్యాంక్ ఖాతాలను ఈడీ ఫ్రీజ్ చేసింది. గతంలో రూ.161 కోట్ల విలువైన ఆస్తులను అటాచ్ చేయగా, మరో విడతలో రూ.12.6 కోట్ల విలువైన ఆస్తులను అటాచ్ చేసింది.

సంస్థ ప్రకటనల్లో కనిపించిన నటుడు జగపతిబాబును సైతం ఈడీ సాక్షిగా విచారించింది. సంస్థ ఎండీ లక్ష్మీనారాయణను 2024 సెప్టెంబర్‌లో ఈడీ అరెస్ట్ చేసింది.

0 మంది ఇష్టపడ్డారు
షేర్
డౌన్‌లోడ్న్యూస్ పేపర్ క్లిప్పింగ్ • హై క్వాలిటీ

మరిన్ని వార్తలు

వ్యాఖ్యానించండి