జవహర్ నవోదయ విద్యాలయాల్లో 9, 11వ తరగతి ప్రవేశాలకు దరఖాస్తు గడువు పొడిగింపు

మహబూబాబాద్, అక్టోబర్ 3: దేశవ్యాప్తంగా ఉన్న జవహర్ నవోదయ విద్యాలయాల్లో 2027–28 విద్యా సంవత్సరానికి 9వ, 11వ తరగతుల్లో ఖాళీగా ఉన్న సీట్ల భర్తీకి నిర్వహిస్తున్న లేటరల్ ఎంట్రీ సెలెక్షన్ టెస్ట్–2027 (JNV LEST-2027) ఆన్‌లైన్ దరఖాస్తుల గడువును అక్టోబర్ 15, 2026 వరకు పొడిగించినట్లు జవహర్ నవోదయ విద్యాలయం, మామూనూర్, వరంగల్ ప్రిన్సిపాల్ టి. రమేష్ తెలిపారు.

నవోదయ విద్యాలయాల్లో అందుబాటులో ఉన్న మౌలిక వసతులను సమర్థవంతంగా వినియోగించుకోవడంలో భాగంగా ఖాళీ సీట్లను భర్తీ చేస్తున్నట్లు తెలిపారు. CBSE అనుబంధం, NCERT పాఠ్యప్రణాళికతో 6వ తరగతి నుంచి 12వ తరగతి వరకు ఆంగ్ల మాధ్యమంలో ఉచిత నివాస విద్యను అందించడం నవోదయ విద్యాలయాల ప్రత్యేకతగా పేర్కొన్నారు.

9వ తరగతి ప్రవేశానికి అర్హత

2026–27 విద్యా సంవత్సరంలో సంబంధిత జిల్లాలోని ప్రభుత్వ లేదా ప్రభుత్వ గుర్తింపు పొందిన పాఠశాలలో 8వ తరగతి చదువుతున్న విద్యార్థులు 9వ తరగతి ప్రవేశానికి దరఖాస్తు చేసుకోవచ్చు. విద్యార్థి 01-05-2012 నుంచి 31-07-2014 మధ్య జన్మించి ఉండాలి. రెండు తేదీలు కూడా వర్తిస్తాయి.

11వ తరగతి ప్రవేశానికి అర్హత

2026–27 విద్యా సంవత్సరంలో సంబంధిత జిల్లాలోని ప్రభుత్వ లేదా ప్రభుత్వ గుర్తింపు పొందిన పాఠశాలలో 10వ తరగతి చదువుతున్న విద్యార్థులు 11వ తరగతి ప్రవేశానికి దరఖాస్తు చేసుకోవచ్చు. విద్యార్థి 01-06-2010 నుంచి 31-07-2012 మధ్య జన్మించి ఉండాలి.

ముఖ్యమైన వివరాలు

• ఆన్‌లైన్ దరఖాస్తుకు చివరి తేదీ: 15-10-2026
• ఎంపిక పరీక్ష తేదీ: 10-04-2027
• మొత్తం సీట్లలో 75 శాతం గ్రామీణ ప్రాంత విద్యార్థులకు, 25 శాతం పట్టణ ప్రాంత విద్యార్థులకు కేటాయిస్తారు.
• మున్సిపాలిటీ/కార్పొరేషన్ పరిధిలోని పాఠశాలలో చదివిన విద్యార్థులను పట్టణ విద్యార్థులుగా పరిగణిస్తారు.
• నిబంధనల ప్రకారం SC, ST, దివ్యాంగులు (PH), బాలికలకు ప్రత్యేక రిజర్వేషన్లు వర్తిస్తాయని ప్రకటనలో తెలిపారు.

అర్హత, ఆసక్తి ఉన్న విద్యార్థులు నవోదయ విద్యాలయ సమితి అధికారిక వెబ్‌సైట్ ద్వారా 9వ, 11వ తరగతులకు అందుబాటులో ఉన్న ప్రత్యేక లింకుల ద్వారా ఉచితంగా ఆన్‌లైన్‌లో దరఖాస్తు చేసుకోవచ్చని ప్రిన్సిపాల్ టి. రమేష్ తెలిపారు.