పండుగ వాతావరణంలో ప్రజలు ఆనందంగా గడపాల్సిన సమయంలో బాలాజీ నగర్‌లోని సుక్కమగుంట ప్రాంతం చెత్త కుప్పలతో దర్శనమిస్తూ స్థానికులను తీవ్ర ఇబ్బందులకు గురిచేస్తోంది. రహదారి పక్కనే పెద్దఎత్తున పేరుకుపోయిన చెత్త, ప్లాస్టిక్ వ్యర్థాలు, కుళ్లిపోయిన వ్యర్థాలు, ఇతర చెత్తాచెదారం కారణంగా పరిసరాలు అపరిశుభ్రంగా మారాయి.

స్థానికులు చెబుతున్న వివరాల ప్రకారం.. చెత్తను ఎప్పటికప్పుడు తొలగించకపోవడంతో రహదారి పక్కనే చెత్త కుప్పలు పేరుకుపోతున్నాయని ఆవేదన వ్యక్తం చేస్తున్నారు.

వర్షాలు కురిసే సమయంలో ఈ చెత్త మరింత సమస్యగా మారే అవకాశం ఉందని, దుర్వాసనతో పాటు దోమలు, ఈగలు పెరిగే పరిస్థితి ఏర్పడుతోందని స్థానికులు ఆందోళన వ్యక్తం చేస్తున్నారు.

పండుగల సమయంలో కాలనీల్లో పారిశుధ్య చర్యలను మరింత పెంచాల్సిన అవసరం ఉన్నప్పటికీ, బాలాజీ నగర్‌లో మాత్రం అందుకు విరుద్ధమైన పరిస్థితులు కనిపిస్తున్నాయని స్థానికులు చెబుతున్నారు.

పండుగ వేళ ప్రజలకు పరిశుభ్రమైన వాతావరణం కల్పించడం మున్సిపల్ యంత్రాంగం బాధ్యత. చెత్త కుప్పల మధ్య ప్రజలు పండుగ జరుపుకోవాల్సిన పరిస్థితి రాకుండా అధికారులు వెంటనే స్పందించాల్సిన అవసరం ఉంది.