అమరవీరుల ఆశయాల సాధనకు ప్రజా పోరాటాలు బలోపేతం చేయాలి

గార్ల మండలంలో అమరవీరులకు నివాళులు.. ప్రజా సమస్యలపై న్యూ డెమోక్రసీ నేతల ప్రసంగాలు

పవార్ వార్త, గార్ల: అమరవీరుల ఆశయాల సాధన కోసం ప్రజా పోరాటాలను బలోపేతం చేయాలని న్యూ డెమోక్రసీ జిల్లా నాయకుడు జడ సత్యనారాయణ, గార్ల మండల కార్యదర్శి జి. సక్రు పిలుపునిచ్చారు. నవంబర్ 3న గార్ల మండలంలోని పలు గ్రామాల్లో అమరవీరుల స్థూపాల వద్ద జెండాలు ఎగురవేసి, అనంతరం నిర్వహించిన సంస్మరణ సభల్లో వారు మాట్లాడారు.

పలు గ్రామాల్లో అమరవీరులకు నివాళులు

గోపాలపురం గ్రామంలో జడ మల్లయ్య తునికాకు అమరవీరుల స్థూపం వద్ద, పిన్ని రెడ్డిగూడెంలో కేలోతు బద్రు, బాలాజీ తండాలో బట్టు బాలు అమరవీరుల స్థూపాల వద్ద జెండాలు ఎగురవేశారు. అనంతరం ఆయా గ్రామాల్లో నిర్వహించిన సభల్లో అమరవీరుల త్యాగాలను స్మరించుకున్నారు.

భూమి, భుక్తి, విముక్తి కోసం భూస్వామ్య, పెట్టుబడిదారీ దోపిడీకి వ్యతిరేకంగా పోరాడి ప్రాణాలు అర్పించిన అమరవీరుల త్యాగాలు భారత విప్లవోద్యమ చరిత్రలో చిరస్మరణీయమని జడ సత్యనారాయణ, సక్రు పేర్కొన్నారు.

భూమి సమస్యలు, నిరుద్యోగంపై విమర్శలు

దేశంలో నేటికీ భూమి సమస్య, నిరుద్యోగం, పేదరికం, శ్రమదోపిడీ, సామాజిక అసమానతలు కొనసాగుతున్నాయని న్యూ డెమోక్రసీ నాయకులు విమర్శించారు. ఈ సమస్యలు పాలకుల వైఫల్యాన్ని చూపుతున్నాయని అన్నారు.

అమరవీరుల త్యాగాలను సంస్మరణ సభల్లో నినాదాలకే పరిమితం చేయకుండా, వారు ఆశించిన దోపిడీ రహిత సమాజ నిర్మాణం కోసం ప్రజలను చైతన్యపరచాలని సూచించారు. రైతులు, వ్యవసాయ కార్మికులు, పేద ప్రజలను ఐక్యం చేసి ప్రజా పోరాటాలను బలోపేతం చేయాలని పిలుపునిచ్చారు.

ప్రజల సమస్యలతో మమేకమైనప్పుడే ఆశయాలకు అర్థం

విప్లవోద్యమం ప్రజల జీవిత సమస్యలతో మమేకమైనప్పుడే అమరవీరుల ఆశయాలకు నిజమైన అర్థం ఉంటుందని నాయకులు పేర్కొన్నారు. ప్రజల సమస్యల పరిష్కారం కోసం ఐక్యంగా పోరాడాల్సిన అవసరం ఉందన్నారు.

ఈ కార్యక్రమాల్లో మండల నాయకులు మట్టపల్లి వీరభద్రం, సీహెచ్ గణేష్, ఈ. రవి, బజారు, భద్రాజి, ఉపేందర్, జి. మాధవరావు, కొండయ్య, పెంటయ్య, గురువయ్య, భద్రయ్య, రామకృష్ణ చారి, కొండలరావు తదితరులు పాల్గొన్నారు.

0 మంది ఇష్టపడ్డారు
షేర్
డౌన్‌లోడ్న్యూస్ పేపర్ క్లిప్పింగ్ • హై క్వాలిటీ

మరిన్ని వార్తలు

వ్యాఖ్యానించండి