కీసర: మేడ్చల్‌–మల్కాజ్‌గిరి జిల్లా కీసర పోలీస్‌స్టేషన్‌ పరిధిలో గంధమాల అజయ్‌కుమార్‌ (21) అదృశ్యమై సుమారు 15 రోజులు గడుస్తున్నా ఆచూకీ లభించకపోవడంతో కుటుంబ సభ్యులు ఆందోళన వ్యక్తం చేస్తున్నారు.

కీసర గ్రామానికి చెందిన అజయ్‌కుమార్‌ సెప్టెంబర్‌ 3న కనిపించకుండా పోయినట్లు కుటుంబ సభ్యులు తెలిపారు. మరుసటి రోజు సెప్టెంబర్‌ 4న కీసర పోలీస్‌స్టేషన్‌లో ఫిర్యాదు చేసినట్లు పేర్కొన్నారు. పోలీసులు ఎఫ్‌ఐఆర్‌ నమోదు చేసినప్పటికీ ఇప్పటివరకు తమ కుమారుడి ఆచూకీ లభించలేదని తల్లిదండ్రులు ఆవేదన వ్యక్తం చేస్తున్నారు.

దర్యాప్తును వేగవంతం చేయాలని కుటుంబం విజ్ఞప్తి

అజయ్‌కుమార్‌ ఆచూకీ కోసం ఫోన్‌ లొకేషన్‌, సీసీ కెమెరాల దృశ్యాలు, కాల్‌డేటాతో పాటు స్నేహితులు, పరిచయస్తుల వివరాలను క్షుణ్ణంగా పరిశీలించి దర్యాప్తును వేగవంతం చేయాలని కుటుంబ సభ్యులు కోరుతున్నారు.

దర్యాప్తు బాధ్యతలు నిర్వహిస్తున్న ఎస్‌ఐ జ్ఞానేందర్‌రెడ్డి తమ ఫిర్యాదుపై ఆశించిన స్థాయిలో స్పందించడం లేదని కుటుంబ సభ్యులు ఆరోపించారు. ఈ ఆరోపణలపై పోలీసుల స్పందన తెలియాల్సి ఉంది.

కుటుంబాన్ని పరామర్శించిన సామాజిక కార్యకర్త

అజయ్‌కుమార్‌ తల్లిదండ్రుల ద్వారా విషయం తెలుసుకున్న కీసర మండల సామాజిక కార్యకర్త తుడుం శ్రీనివాస్‌ వారి నివాసానికి వెళ్లి కుటుంబ సభ్యులను పరామర్శించారు.

అజయ్‌కుమార్‌ ఆచూకీ త్వరగా లభించేలా సంబంధిత అధికారుల దృష్టికి సమస్యను తీసుకెళ్లి, కుటుంబానికి న్యాయం జరిగేలా తన వంతు కృషి చేస్తానని హామీ ఇచ్చినట్లు తెలిపారు.

కమిషనర్‌ను కలవనున్న తుడుం శ్రీనివాస్‌

అజయ్‌కుమార్‌ ఆచూకీ కోసం ప్రత్యేక దృష్టి సారించి దర్యాప్తును వేగవంతం చేసేలా చర్యలు తీసుకోవాలని కోరుతూ శుక్రవారం ఉదయం కమిషనర్‌ సుమతి మేడంను కలవనున్నట్లు తుడుం శ్రీనివాస్‌ తెలిపారు.