తెలంగాణ రాష్ట్రంలోని కస్తూర్బా గాంధీ బాలికల విద్యాలయాల్లో (KGBV) పనిచేస్తున్న నాన్ టీచింగ్ సిబ్బంది, వర్కర్ల వేతనాలు పెంచడంతో పాటు ఇతర సమస్యలను పరిష్కరించాలని ప్రగతిశీల కేజీబీవీ నాన్ టీచింగ్ వర్కర్స్ యూనియన్ (TUCI) డిమాండ్ చేసింది. ఈ నెల 11న నిర్వహించనున్న ‘చలో హైదరాబాద్’ కార్యక్రమానికి సంబంధించిన ప్రచార కరపత్రాలను మాక్లూర్ కేజీబీవీలో ఆవిష్కరించారు.

ఈ సందర్భంగా యూనియన్ రాష్ట్ర ప్రధాన కార్యదర్శి ఎం. సుధాకర్ మాట్లాడుతూ.. కేజీబీవీ నాన్ టీచింగ్ సిబ్బంది, వర్కర్ల వేతనాలు ఏళ్లుగా పెరగలేదని అన్నారు. మరోవైపు పని భారం పెరిగిందని పేర్కొన్నారు. సమస్యలను పరిష్కరించాలని విన్నవించినప్పటికీ అదనంగా నైట్ డ్యూటీలు వేశారని ఆయన ఆరోపించారు.

కేజీబీవీల పట్ల గత ప్రభుత్వంతో పోలిస్తే ప్రస్తుత ప్రభుత్వం కక్షపూరితంగా వ్యవహరిస్తోందని ఎం. సుధాకర్ ఆరోపించారు. గత మూడేళ్లుగా అధికారులు, ప్రభుత్వం, ప్రజాప్రతినిధులను కలిసి సమస్యలను పరిష్కరించాలని విన్నవిస్తున్నామని తెలిపారు. ఇక పోరాటం తప్ప మరో మార్గం లేదని పేర్కొన్నారు.

కనీస వేతనాలు అమలు చేయాలని డిమాండ్

ముఖ్యమంత్రి ప్రకటించిన కనీస వేతనాలనైనా కేజీబీవీల్లో పనిచేస్తున్న నాన్ టీచింగ్ సిబ్బంది, వర్కర్లకు తక్షణమే అమలు చేయాలని ఎం. సుధాకర్ డిమాండ్ చేశారు.

అకౌంటెంట్లు, వర్కర్లకు నిబంధనలు, జాబ్ చార్ట్‌కు భిన్నంగా ఇటీవల కేటాయించిన నైట్ డ్యూటీలను రద్దు చేయాలని కోరారు. వర్కర్లకు వారానికి ఒకరోజు చొప్పున వీక్లీ ఆఫ్ అమలు చేయాలని డిమాండ్ చేశారు.

ఖాళీగా ఉన్న పోస్టులను భర్తీ చేసి పని భారాన్ని తగ్గించాలని, ప్రభుత్వ ఉద్యోగాల్లో చేరేందుకు అర్హతలు ఉన్న నాన్ టీచింగ్ సిబ్బందికి వెయిటేజీ ఇవ్వాలని కోరారు. రిటైర్మెంట్ వయసును 65 సంవత్సరాలకు పెంచడంతో పాటు రిటైర్మెంట్ బెనిఫిట్స్ ఇవ్వాలని డిమాండ్ చేశారు.

కేజీబీవీ నాన్ టీచింగ్ సిబ్బంది, వర్కర్లకు పీఎఫ్, ఈఎస్ఐ అమలు చేసి ఉద్యోగ, ఆరోగ్య భద్రత కల్పించాలని ఎం. సుధాకర్ కోరారు.

చలో హైదరాబాద్‌కు తరలిరావాలని పిలుపు

ఈ నెల 11న నిర్వహించనున్న చలో హైదరాబాద్ కార్యక్రమానికి రాష్ట్రవ్యాప్తంగా ఉన్న అన్ని కేజీబీవీల నాన్ టీచింగ్ సిబ్బంది, వర్కర్లు పెద్ద సంఖ్యలో హాజరై కార్యక్రమాన్ని జయప్రదం చేయాలని ఎం. సుధాకర్ పిలుపునిచ్చారు.

‘పనికి తగ్గ జీతం ఇవ్వాలి’

కేజీబీవీ వర్కర్ విజయమ్మ మాట్లాడుతూ.. ప్రభుత్వం తమతో వెట్టిచాకిరి చేయిస్తోందని ఆవేదన వ్యక్తం చేశారు. ఖాళీ పోస్టులను భర్తీ చేసి పని భారాన్ని తగ్గించాలని కోరారు. పనికి తగ్గ జీతం ఇవ్వాలని ప్రభుత్వానికి, అధికారులకు విజ్ఞప్తి చేశారు.

ఈ కార్యక్రమంలో కేజీబీవీ సిబ్బంది మోతి, రమ, శారద, సువర్ణ, శారదమ్మ, ఆండాలు, కృష్ణవేణి తదితరులు పాల్గొన్నారు.