జవహర్‌నగర్ డంపింగ్ యార్డ్‌పై ఆరోపణలు.. గాదరి సోమయ్య మృతిపై విచారణకు డిమాండ్

డంపింగ్ యార్డ్ ఎత్తివేయాలని పోరాట కమిటీ డిమాండ్

మేడ్చల్–మల్కాజిగిరి జిల్లా, కీసర సర్కిల్, జవహర్‌నగర్ డివిజన్:
జవహర్‌నగర్ రాంకీ డంపింగ్ యార్డ్ కారణంగానే గాదరి సోమయ్య మృతి చెందారని
డంపింగ్ యార్డ్ ఎత్తివేత పోరాట కమిటీ చైర్మన్
షేక్ షావలి, చైతన్య మహిళా సంఘం నాయకురాలు
అల్లూరి సావిత్రి ఆరోపించారు.

జవహర్‌నగర్‌లోని గబ్బిలాలపేట, ఈస్ట్ నందమూరి నగర్ ప్రాంతంలో సుమారు
30 ఏళ్ల క్రితం వలస వచ్చి స్థిరపడిన గాదరి సోమయ్య జీవనోపాధి కోసం
గత 15 ఏళ్లుగా కాంట్రాక్ట్ మున్సిపల్ కార్మికుడిగా పనిచేసినట్లు తెలిపారు.

డంపింగ్ యార్డ్ నుంచి వెలువడుతున్న దుర్వాసన, కాలుష్యం, విషవాయువుల
కారణంగా పరిసర ప్రాంతాల ప్రజలు అనేక ఆరోగ్య సమస్యలను ఎదుర్కొంటున్నారని
నాయకులు పేర్కొన్నారు. డంపింగ్ యార్డ్‌ను తొలగించడంలో ప్రభుత్వం
తక్షణ చర్యలు చేపట్టాలని డిమాండ్ చేశారు.

సోమయ్య కుటుంబాన్ని ఆదుకోవాలి

గాదరి సోమయ్య మృతిపై స్థానికుల్లో అనేక అనుమానాలు ఉన్నాయని,
ఆయన మృతికి డంపింగ్ యార్డ్ కాలుష్యంతో సంబంధం ఉందని నాయకులు ఆరోపించారు.
అయితే ఈ ఆరోపణలను నిర్ధారించేందుకు అధికారిక వైద్య, దర్యాప్తు నివేదికలు
అవసరమని పేర్కొన్నారు.

సోమయ్య కుటుంబాన్ని ప్రభుత్వం అన్ని విధాలా ఆదుకోవాలని
షేక్ షావలి డిమాండ్ చేశారు. డంపింగ్ యార్డ్‌ను పూర్తిగా
తొలగించే వరకు ప్రజలంతా ఏకమై పోరాటంలో భాగస్వాములు కావాలని పిలుపునిచ్చారు.

సోమయ్య కుటుంబాన్ని పరామర్శించిన నాయకులు

గాదరి సోమయ్యకు నివాళులర్పించి కుటుంబ సభ్యులను పరామర్శించిన వారిలో
అల్లూరి సావిత్రి, స్థానిక బస్తీ మహిళా నాయకురాలు శారద,
చికెన్ యాదగిరి, అంబేద్కర్ సంఘం నాయకులు, యువ నాయకులు
తురుగొండ కొమురయ్య, గుండె రాజు, జేరిపోతుల శేఖర్,
జర్నలిస్ట్ గాదరి స్వామి తదితరులు ఉన్నారు.

“జీవించే హక్కులో పర్యావరణ హక్కు కూడా భాగమే”

జవహర్‌నగర్ ప్రజల ఆరోగ్యం, పర్యావరణ పరిరక్షణకు ప్రభుత్వం
తక్షణ చర్యలు తీసుకోవాలని అల్లూరి సావిత్రి డిమాండ్ చేశారు.

తెలంగాణ పవర్ దినపత్రిక