భవన నిర్మాణ కార్మికుల హక్కులు, పని గంటలు, కనీస వేతనాలు, సామాజిక భద్రత తదితర అంశాలపై అవగాహన సమావేశం నిర్వహించారు. ఈ సమావేశంలో పాల్గొన్న భవన నిర్మాణ కార్మికులు తమ సమస్యలు, హక్కులపై మాట్లాడారు.

కార్మికుల ప్రాణ త్యాగాల పునాదులపై సాధించుకున్న “ఎనిమిది గంటల పని, ఎనిమిది గంటల విశ్రాంతి, ఎనిమిది గంటల వినోదం” అనే నినాదంతో సాగిన చారిత్రక పోరాటాల ఫలితంగా కార్మిక హక్కులు ఏర్పడ్డాయని వారు పేర్కొన్నారు.

కాంట్రాక్ట్ వ్యవస్థ పేరుతో ఎనిమిది గంటలు చేయాల్సిన పనికి మించి, ఓవర్‌టైమ్ పేరుతో సమయం, సందర్భంతో సంబంధం లేకుండా ఎక్కువ పని చేయిస్తున్నారని కార్మికులు ఆరోపించారు. దీని వల్ల కార్మికుల హక్కులు అమలుకు నోచుకోవడం లేదని వారు పేర్కొన్నారు.

భవన నిర్మాణ కార్మికులకు ఎనిమిది గంటల పని దినం అమలు కావాలని వారు కోరారు. అలాగే శ్రమకు తగిన కనీస వేతనం అందించాలని పేర్కొన్నారు. కాంట్రాక్ట్ పేరుతో తక్కువ కూలి చెల్లిస్తూ, ప్రశ్నించే హక్కు, సంఘటితమయ్యే స్వేచ్ఛకు భంగం కలిగే పరిస్థితులు ఉన్నాయని వారు ఆరోపించారు.

భవన నిర్మాణ పనుల్లో ప్రాణాలను అరచేతిలో పెట్టుకుని పనిచేస్తున్న కార్మికులు ప్రమాదాలకు గురైనప్పుడు సామాజిక భద్రతకు సంబంధించిన సమస్యలు ఎదురవుతున్నాయని సమావేశంలో పాల్గొన్న వారు పేర్కొన్నారు. ఇది ఆర్థిక, శ్రామిక దోపిడీకి దారితీస్తోందని వారు ఆరోపించారు.

కార్మికుల హక్కులు, ఆర్థిక సాయం, సామాజిక భద్రత కోసం ఐక్యంగా పోరాడాలని, తమతో పాటు భవిష్యత్ తరాల హక్కుల కోసం కూడా ఉద్యమించాలని కార్మికులు పిలుపునిచ్చారు.

సమావేశంలో పాల్గొన్న వారు

ఈ కార్యక్రమంలో భవన నిర్మాణ కార్మిక సంఘం వ్యవస్థాపక అధ్యక్షులు మహామేస్త్రి మర్లు సాయిబాబు, మండల ఉపాధ్యక్షులు సాయిలు, ప్రధాన కార్యదర్శి కరీం, కార్యదర్శి గణేష్, కోశాధికారి దుర్గా సింగ్, లక్ష్మణ్, సీనియర్ నాయకులు, ప్రచార కార్యదర్శి చందు, సలహాదారులు పోచయ్య, రామ్మోహన్ రావు, రాజు, సూరిబాబు, మహేందర్, లిఫ్టు రాజు, రవి, సాయిలుతో పాటు పలువురు కార్మికులు పాల్గొన్నారు.