మహబూబాబాద్ జిల్లా వ్యాప్తంగా ఈ ఏడాది మొత్తం 2,380 గణేష్ విగ్రహాలను ప్రతిష్ఠించారు. అందులో 937 విగ్రహాల నిమజ్జనం బుధవారం రోజున జరగనుంది. ఈ నిమజ్జన ఉత్సవాలు ప్రశాంత వాతావరణంలో, ఎలాంటి అవాంఛనీయ సంఘటనలు చోటుచేసుకోకుండా పూర్తిచేసేందుకు పోలీస్ శాఖ ఆధ్వర్యంలో పటిష్ట భద్రతా చర్యలు చేపట్టినట్లు మహబూబాబాద్ జిల్లా ఎస్పీ డా. శబరీష్ తెలిపారు.

సోమవారం మహబూబాబాద్ పట్టణంలోని ప్రధాన నిమజ్జన కేంద్రమైన నిజాం చెరువును ఎస్పీ సందర్శించారు. అక్కడ చేపట్టిన భద్రతా ఏర్పాట్లను ప్రత్యక్షంగా పరిశీలించి అధికారులకు పలు కీలక సూచనలు చేశారు.

భద్రతా ఏర్పాట్లు

నిమజ్జన ప్రక్రియ సజావుగా సాగేందుకు 4 మంది డీఎస్పీలు, 15 మంది సీఐలు, 30 మంది ఎస్ఐలతో పాటు మొత్తం 500 మంది పోలీస్ సిబ్బందిని బందోబస్తు విధులకు కేటాయించారు. నిమజ్జన ప్రాంతాలు, ఊరేగింపు మార్గాల్లో సిసి కెమెరాలను ఏర్పాటు చేసి, కంట్రోల్ రూమ్ ద్వారా భద్రతను నిరంతరం పర్యవేక్షిస్తున్నారు.

నిమజ్జన పాయింట్ల వద్ద అత్యవసర సహాయం అందించేందుకు ప్రత్యేక రెస్క్యూ టీమ్‌లను, శిక్షణ పొందిన ఈతగాళ్లను, తగినన్ని క్రేన్లను అందుబాటులో ఉంచారు. చెరువుల వద్ద ప్రజలు లోతుల్లోకి వెళ్లకుండా బారికేడ్లు ఏర్పాటు చేశారు.

నిమజ్జనం సందర్భంగా డీజేల వాడకానికి ఎలాంటి అనుమతి లేదని ఎస్పీ స్పష్టం చేశారు. నిబంధనలు అతిక్రమిస్తే చట్టపరమైన చర్యలు ఉంటాయని ఆయన హెచ్చరించారు. నిమజ్జన కార్యక్రమం పూర్తయ్యే వరకు విధుల్లో ఉన్న అధికారులు, సిబ్బంది క్షేత్రస్థాయిలో అప్రమత్తంగా ఉంటూ నిరంతరం పర్యవేక్షించాలని ఎస్పీ ఆదేశించారు.

శాంతిభద్రతల పరిరక్షణకు, ఉత్సవాల సురక్షిత నిర్వహణకు ప్రజలు, గణేష్ ఉత్సవ కమిటీ సభ్యులు మరియు నిర్వాహకులు పోలీస్ శాఖకు పూర్తిస్థాయిలో సహకరించాలని జిల్లా ఎస్పీ డా. శబరీష్ విజ్ఞప్తి చేశారు.